Minister Rocco Tjon: A ATENDE E CONGRESO ‘NO MAS NO MORE’ NA CURACAO DEN CUADRO DI VIOLENCIA RELACIONAL Y ABUSO DI MUCHA

WILLEMSTAD – For di 31 di oktober pa dia 2 di november ta tuma luga na Curacao, e conferencia bi-anual tocante violencia domestico y asbuso di mucha esta ‘No Mas No More’. E conferencia aki ta special pa profesionalnan cu ta traha den e veld di violencia domestico y abuso di mucha for di e seis islanan den Caribe y Reino Hulandes. E congreso aki a wordo organisa pa Ministerio di Salud y Deporte, conhuntamente cu Ministerio di Desaroyo Social y Labor di Curaçao.

Durante e congreso aki, Minister Tjon a firma e di dos Memorandum of Understanding (MOU) pa Taskforce Kinderrechten den cual a renoba e compromiso pa mehora e implementacion di e Tratado Derecho di Mucha den Reino Hulandes. Oficialnan di Gobierno di Aruba, Boneiro, Curaçao, Saba, St. Eustatius, St. Maarten, y Hulanda a firma e MOU aki cual lo sigui forma e base di cooperacion entre e paisnan den Reino Hulandes.

E Taskforce a firma su prome MOU dia 20 di November 2018, cual tawata Dia Internacional di Derecho di Mucha. E MOU a defini e base di locual cada pais den Reino lo mester bay traha hunto riba dje, cu e meta pa mehora e implementacion di derechonan di mucha den e parti Caribe di Reino. E partnernan a palabra pa comparti conocemento y experiencia, desaroya un plan di trabou pa e taskforce y plan di accion individual pa e isla y paisnan. E monitoreo di e progreso den implementacion di e plannan aki tambe tawata un prioridad, y e enfoke tawata riba e seis puntonan clave: lantamento di mucha na un manera positivo, prevencion di abuso di mucha, desaroyo di rednan di siguridad, participacion di hobennan, acceso na servicionan profesional y atencion na muchanan vulnerabel.

Banda di esaki, minister Tjon a firma e prome MOU pa loke ta e plataforma den Reino Hulandes “No Mas No More”. E plataforma aki ta dirigi su mes riba trabounan di prevencion y combatimento di  violencia relacional. E MOU lo percura pa intensifica e cooperacion entre e islanan den Reino Hulandes pa asina mehora e cumplimento di derechonan di (posibel) victimanan di violencia relacional y abuso di mucha, coordinacion operacional entre e islanan pa loke ta shelter pa victima, implimentacion y coordinacion di e Codigo di Proteccion y/of cooperacion riba e area aki, intercambio di informacion y capacitacion riba e tema di violencia relacional y abuso di mucha.