Minister Dangui Oduber :REUNION PA SIGUI REINFORSA E PROME LIÑA DI CUIDO Y EXPLORA E POSIBILIDAD CU CLINICA & UNIVERSIDADNAN DEN REGION.
ORANJESTAD – Diamars atardi Minister di Turismo y Salud Publico sr. Dangui Oduber, y ministerio di salud, a continua cu reunionan hunto cu director di ImSan sr. Rajnherc pa yega na un consenso pa traha hunto y pa asina sigui reforsa e structura di cuido di salud na Aruba. Diferente palabracion y puntonan a wordo discuti pa mehora un sistema sostenibel di cuido di salud.
E mandatario ta splica cu un di e projectonan cu ser discuti ta pa amplia e “huisarsten opleiding” pa asina crea oportunidadna na nos yuinan di tera cu a completa nan “basisarts” den region, reconoci dor di AruBIG, pa continua e specialismo di “huisarts” aki na Aruba mes. Esaki sigur ta un hopi bon noticia den cuadro di e mehoracion den calidad di cuido.
E enfoke di Minister Dangui Oduber ta pa continua cu e mehoracion di cuido. Pa logra e meta aki a discuti posibilidadnan di cooperacion cu clinicanan acredita y renombra di Colombia. Un di e projectonan discuti ta e posibilidad pa atrae mas dokter y specialistanan manera por ehempel opthalmogist “specialista/dokter di wowo” pa asina por brinda mas servicio na nos pueblo.
Otro bon noticia ta cu lo sigui inverti den Aruba su profesionalnan medico. E biaha aki lo bay inverti den nos futuro dokternan di cas fortificando e prome liña di cuido. Esaki lo susode por medio di e asina yama HOED “Huisarten Onder Een Dak” cual lo conisti di 3 dokter di cas cu lo inicia den prome kwartaal di 2024. E HOED lo reenforsa e prome liña di cuido y trese mas accesibilidad na nos patientnan cu mester di e cuido aki. Sigur esaki ta un logro cu Minister Dangui Oduber y ImSan management ta orguyoso di dje.
Finalmente, Minister Oduber a splica cu ImSan ta e prome hospital cu e accreditacion “Joint Commision International (JCI)” den ful e region di Caribe Hulandes. E mandatario a sigui bisa cu e standard cu ImSan a pone pa Aruba su calidad di cuido medico ta uno di nivel mundial. E accreditacion di JCI no ta enfoca solamente ariba e calidad di cuido y servicio cu sigur ta di vital importancia, pero ta pone seguridad di pashentnan y trahadornan tambe como prioridad pa asina pone e standard di mas halto cu por existi. E accreditation di JCI tambe ta crea opportunidadnan pa Aruba sigui explora e sector di turismo medico.
E maneho di Ministerio di Salud Publico ta dirigi riba mehora e calidad di cuido y servicio. E meta principal ta pa percurpa pa hasi inversionan continuo den cuido medico pa percura pa gastonan keda manehabel y sostenibel.
