Minister Glenbert Croes ta informa: CENTRO DI HOBEN Y FAMIA, TAMBE TA FORMA PARTI DI E PROYECTO PILOTO HUNTO CU DPL Y DAS

ORANJESTAD – Recientemente, Minister di Labor Glenbert Croes a anuncia cu Departamento di Progreso Laboral (DPL), den cooperacion cu Departamento di Asuntonan Social (DAS) y Centro di Hoben y Famia, lo inicia cu un trayecto pa inverti den capacitacion di cada participante pa asina engrandece nan conocimento, facilitando pa nan, e proceso pa drenta e mercado laboral.

Den cuadro di e proyecto aki, a entrevista sra. Yvonne Bermudes di Centro pa Hoben y Famia pa duna un splicacion cortico riba e proyecto importante aki. Sra Bermudes a splica cu Centro di Hoben y Famia ta un departamento preventivo di DAS, cu tambe ta colaborando cu e proyecto piloto aki. Pa cu esaki, Departamento di Asunto Social y Departamento di Progreso Laboral a inicia cu algun sesionnan interesante pa ofrece tur esnan cu ta buscando trabou.  

Sra Bermudes ta invita tur esnan den necesidad pa un trabou pa inscribi na DPL pa asina por asisti na e sesionnan aki y siña un tiki mas di con pa traha riba desaroyo personal, para keto na tur e facetanan cu tin mester y cu ta importante pa nan cu ta buscando trabou, pa ta miho prepara na momento di un entrevista. Centro di Hoben y Famia lo provee na e sesion piloto aki, 2 facilitador cu lo ta forma parti di e sesionnan piloto aki, cu lo splica y duna informacion importante, yudando asina tur esnan cu ta buscando trabou pa tin un trayecto exitoso.

Un workshop cu lo tin un duracion di 5 siman cu diferente facilitadornan, cu ta bay enfoca riba preguntanan cardinal manera “ken mi ta, kico mi kier, kico mi por, kico mi ta gusta” pues un retrospecto personal profundo pa yuda e participante descubri su talento y cualidadnan. Pero durante e curso tambe lo instrui e cursistanan riba nan debernan como tambe nan derechonan laboral.

Na final di e curso tur participante lo ricibi un certificado di reconocimento. Pero mas importante cu esaki, e cursista lo culmina e trayecto aki cu un satisfaccion personal enorme.

Pa e mandatario encarga cu Labor, e iniciativa aki ta sumamente importante pasobra manera el a splica: “cu a pesar cu desempleo ta bahando na Aruba, nos kier haci cada empeño pa cualkier persona cu ta buscando y no ta hayando trabou. Nos kier yud’e haya trabou y nos kier yud’e keda cu un trabou. Y nos mester pa nos yiunan di tera tae protagonista, ta e actornan principal den e progreso economico y progreso laboral di nos Pais.”

Na final di e Trayecto pa Progreso Personal y Laboral, durante cual cursistanan a ricibi training tambe riba con presenta su mes durante un entrevista di trabou, DPL lo percura pa cada un cursista haya entrevista cu mas cu un dunado di trabou. Y Minister Glenbert Croes ta sigur cu danki na e trayecto aki, e cursistanan lo haya y keda cu un trabou tambe.