Parlamentario Marco Berlis (MEP): Marcha Pro-Famia

Pueblo a bin ta sigui di cerca e desaroyonan riba e caso den casacion den corte riba e aprobacion di matrimonio pa personanan di e mesun sexo. E veredicto final lo tuma lugar dia 10 di november 2023 na Hulanda. Tin hopi atencion pa e caso aki y ya caba ta comentando ki consecuencianan esaki lo por tin pa nos pais. Mirando cu fundacion Orguyo mes a vocifera cu si casacion ta dicta na na fabor, no solamente matrimonio mesun sexo ta un hecho, pero cu lo mester cuminsa cu conscientisacion inmediato na scolnan di nos pais. E agenda LGBTQ+ no ta djis interesa pa e matrimonio di mesun sexo wordo introduci na nos pais, sino cu nan ta boga y ta pushando un agenda cu ta enfocando riba nos yiunan. Nos yiunan ta core e riesgo pa wordo indoctrina y confundi cu informacion riba tereno homosexual y inadecua pa nan edad. E material pa cu esaki ta existi caba na hopi pais, incluyendo Hulanda y ta un decision mester cu lo por determina esaki facilmente. Material di ideologia di genero ta existi pa muchanan for di 1 aña bay ariba! Asina mes,1 aña bay ariba! Esaki sigur ta inaceptabel, mirando cu nos yiunan ta bay scol pa wordo educa riba materianan pa asina nan wordo prepara pa ta un profesional den futuro y no pa nan wordo confundi ta ki “genero” nan ta.

Un marcha Pro-Famia tradicional diabierna awor

Diabierna awor pa 5:00 di atardi lo tin un marcha pro-famia tradicional cual ta cuminsa na Citgo Boulevard y lo culmina na Bestuurskantoor, cu ta e entrada oficial di Gobierno. E meta ta pa marcha pa e famia tradicional y e lucha pa e mayornan tin e poder di educa nan propio yiunan segun nan balornan, etica, moral, y principionan cu nan a lanta cu ne. Esaki sigur nunca mag di resorta bao di e autoridad di ningun instancia of Gobierno. E marcha aki lo ta un marcha pacifico cu ta habri pa tur hende uni na dje. Forma bo grupo, bisti un t-shirt blanco of cora y bin join e causa noble y importante aki. Ban uni pa nos lucha pa nos derechonan sagrado pa conserva e diseño di e famia tradicional. Ban uni pa manda un mensahe cla na esnan di e agenda di ideologia di genero cu hamas nos lo compromete nos yiunan pa wordo indoctrina y confundi dor di un ideologia cu no tin ni pia ni cabes.

Nos yiunan mester wordo protegi

Mundo ta cambiando constantemente, sinembargo no ta tur loke ta sosodiendo eyfo nos mester ta di acuerdo cu ne. Nos yiunan ta sagrado! Como mayornan nos mester marca un liña y bisa ta basta. Ban demostra cu nos ta serio y determina pa protege nos yiunan, nietonan y e futuro generacion di e ideologia destructivo aki. Ban hunto marcha diabierna awor 5pm!

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo Parlamentario y sirbidor di pueblo na bo ordo semper!