Parlamentario di Fraccion di MEP, Shailiny Tromp-Lee: Nos por sinti un biento hopi positivo den deporte

Mei mei di tur e retonan cu nos pais conoce mara na nos recuperacion, nos por tuma nota di un biento hopi positivo den deporte. Deporte ta hayando un atencion cu pa hopi aña e no a conoce. Prome tabata e falta di vision y amor pa deporte di parti AVP cu sigur a laga e infrastructura deportivo na Aruba na werki y Lotto den man di Canada. Despues un discusion eterno pa por haya un directiva di FLPD cu ta pone Lotto bek riba e railsnan trahando berdaderamente na e bienestar di nos deportistanan y percurando pa e fondonan necesario pa mantene y desaroya e infrastructura deportivo aki na Aruba.

Nos tur por a tuma nota di e diferente proyectonan andando manera trabounan grandi tumando lugar den Stadion GPT na Dakota. E stadion ta hayando un renobacion total y ya nos por a mira weganan internacional cu despues di mas cu 10 aña porfin por keda hunga na cas bek. Sigur esaki lo yuda enormemente pa reduci e gastonan mirando cu tur e añanan aki mester a paga pa Aruba bay hunga na un otro pais. Den un reunion di Comision Fiho di Deporte AVB a yega di indica cu e viahenan aki ta costa nos Afl. 80.000 y door cu e exigencia ta cu mester hunga 3 wega na cas, esaki tabata costa nos Afl. 240.000 pa aña. Mi ta aplaudi e hecho cu Gabinete I y II, mediante empenio di ministernan Dangui Oduber y Endy Croes nos ta logra tin bek un Stadion cu ta cumpli cu FIFA Standard pa nos selecionnan por hunga bek na cas y nos clubnan tin un veld cu nan por prepara pa nan weganan internacional. Un proyecto cu ta keda financia pa Gobierno di Aruba y FLPD.

Otro proyecto ta e BMX Track na Parke Jaburibari cu a keda renoba y a haya iluminacion completo. BMX ta un deporte cu conoce un desaroyo hopi positivo y mas y mas mucha ta practicando esaki. Danki na Gabinete Wever Croes II, Lotto pa Deporte, Fundacion Facilidadnan Deportivo (FFD), Quick Electra, Time Line, Elmar, AWB, BMX, ATA y demas stakeholders cu a traha hunto e proyecto aki por a bira un realidad. Ya caba un di e motornan tras di e proyecto aki sigur ta sr. Simon y nos mester gradici’e pa esaki tambe. Ya caba a tuma lugar un careda internacional caminda 12 pais a participa cu mas cu 200 coredor den diferente categoria.

Sigur nos por a sigui di cerca ora a cende e luznan di Palo Marga pa careda oficial. Un proyecto cu Minister Endy Croes a duna su maximo pa mira esaki keda realisa. Banda di algun trabounan di mantencion. Un grupo di amante di e deporte aki den pasado a reuni cu Parlamento pa pidi atencion pa nan necesidadnan cu Palo Marga y awe poco poco nos ta mira cu tin progreso.

Nos por a experencia Weganan Escolar (WE) organisa pa 2 aña consecutivo y cu ta un exito total. Alabes despues di 7 aña Weganan Interinsular cu a keda rebiba bek y tambe tabata un exito total. Ambos weganan ta sumamente necesario y importante pa fomenta deporte bou di mucha y hobennan.

Sigur otro proyecto ta “Ban Caya”. Un proyecto cu Cede Aruba hunto cu Gobierno, IBISA y mas stakeholders a inicia cu ne. Prome tabata na Noord. Organisacionnan Social, Salud, Arte, Cultura y Deportivo a yena e cayanan cu a keda cera pa e actividadnan aki. Asina nos por menciona hopi mas.

Nos ta consciente cu tin hopi mas pa haci den y pa deporte pero negligencia di asina hopi aña bo no ta logra corigi mes lihe cu ta desea.