Parlamentario Fraccion di MEP, Dr. Arthur Vallejo a revela: CMO ta den espera di un Campamento Hospitalario completo cu ta inclui espacio pa 1 intensive Care Unit remoto

ORANJESTAD, Aruba 6 di November 2023: Crisis Management Office (CMO) tin bon noticia pa sector salud, asina Parlamentario Arthur Vallejo a revela despues cu Fraccion di MEP a haci un bishita recientemente na CMO.

El a laga sa cu CMO ta den espera di un Campamento Hospitalario completo cu mashin medico cu ta inclui espacio pa 1 Intensive Care Unit remoto. E ultimo produccion di e unidadnan aki a wordo aloca na e desaster natural di Turkia y conflicto arma – humanitario manera Ukraina- Rusia y kizas awor Israel – Gaza. Esaki ta trece retraso den esun cu Aruba lo mester ricibi di e organisacion aki pasobra e ekipamento ta bay prome na unda sigur tin bon uzo pa e ekiponan aki, pero na CMO nan ta optimista cu pronto lo conta cu e unidad hospitalario mobil aki na servicio di e comunidad di Aruba.

Vallejo ta mustra cu hopi biaha den e cadena di activacion pa un crisis ya sea ‘bomb melding, candela etc’ ta faya di inclui CMO den e cadena di activacion pa cu e yudansa y experticio cu CMO por brinda. CMO ta hopi bon ekipa pa yuda den momentonan di crisis cu diferente unidad mobil y material, y mas cu claro mas importante ta e forma con pa atende diferente tipo di crisis.

E Parlamentario a agrega cu mester sigui traha pa informa continuamente y haci sesionnan di training (simulacion) pa cu calamidad di temblor, tsunami, candela na scol, entre otro pa informa tur trahador y of directiva di institucionnan pa e activacion di CMO den momentonan di crisis den tur sector cu CMO por brinda yudansa y of cooperacion – coordinacion. En especial empleadonan cu ta nobo na pia di trabou of den posicion di activacion mester wordo bon informa riba e papel activo cu CMO tin, a bisa.

Tur institucion grandi cu ta carga hopi empleado y cliente of eventonan di entretenimento cu ta reuni un gran cantidad di hende sigur mester inclui activacion di CMO den nan protocol pa preparacion den un posibel situacion di calamidad.

Pa Vallejo ta importante tambe pa reconoce cu CMO por yuda den hopi otro aspecto incluyendo emergencianan di tipo social cu tent cu por setup den menos cu 2 minuut pa ora di un situacion di crisis of pa un famia cu por a perde un cas den candela, por ehempel, pa e prome 72 oranan di uzo y despues arma un tent di e grandura di un cas chikito pa uzo di 10 dia continuo cu cuminda.

CMO lo yuda coordina diferente situacion pa garantisa seguridad, pero tambe eficiencia den maneho di calamidad, a splica.

CMO tin un number di telefon cu ta 588- 0100. Tin un number di urgencia tambe directo cu ta wordo duna na institucionnan cu tin alto riesgo di calamidad.

Finalmente Parlamentario Vallejo a indica cu ora ta papia di Aruba manera un destinacion turistico sigur y confiabel e aspecto aki di tin un CMO bon organisa y prepara ta vital y central pa e economia di Aruba.

Palabranan di felicitacion pa e calidad humano di cada un di e trahadornan di CMO, nan dedicacion y seriedad pa cu organizacion y protocolnan pa logra drenta den accion y ta presente ora Aruba lo tin mester di nan yudansa, asina Parlamentario Vallejo a duna di conoce.