CASACION DEN CASO DI FUNDACION ORGUYO

Riba 10 di November proximo lo tuma luga, e tratamento di e cassatie na “Hoge Raad”, cu pais Aruba a entama contra e veredicto di corte comun di husticia di Aruba, Curacao, Sint Maarten, y Boneiro, Sint Eustatius y Saba, di 6 di December 2022. Den e veredicto ey, corte comun di husticia a establece cu den e legislacion di Aruba, matrimonio ta reserva pa personanan di e sexo opuesto. Segun Corte comun di husticia, di un banda, hurisprudencia di Corte Europeo di derecho humano (EHRM), ta establece cu esaki no ta un violacion di e tratado Europeo di derecho humano (EVRM). Pero di otro banda, cu esaki ta empugna cu e prohibicion di discriminacion den nos constitucion di Aruba. Y a base di e ultimo aki, Corte comun di husticia ta yega na e formulacion di e legislacion na Aruba, cu matrimonio no por wordo reserva solamente pa persona di sexo opuesto sino tambe pa persona di mesun sexo.

Gobierno di Aruba, ta di opinion cu e veredicto aki, no ta alinea cu e principionan constitucional  di separacion di poder, pasobra Corte comun di husticia defacto, a bay sinta riba e stoel di e legislador (wetgever). E decision pa habri matrimonio pa persona di mesun sexo, ta un decision cu mester wordo tuma door di e legislador di Aruba, pues Gobierno y Parlamento hunto.  Gobierno di Aruba ta di opinion, cu e hecho cu hues a aplica e prohibicion di discriminacion di nos constitucion, no por bay asina leu cu e hues mes por dicidi con cierto partinan den nos Codigo Civil mester wordo duna contenido, y wordo aplica. Ademas, Gobierno di Aruba ta di opinion cu e paso di corte comun di husticia pa mete den e legislacion di Aruba, a wordo subestima, si pensa cu ta solamente algun aspecto di e codigo civil mester wordo corehi. Pasobra si habri matrimonio pa persona di mesun sexo, esaki lo exigi hopi mas adaptacionnan  den legislacionnan, caminda no solamente e articulonan cu corte comun di husticia ta menciona di codigo civil, sino otro partinan di codigo civil y diferente otro ley y areglonan mester wordo adapta. Sin un base legal, e cambionan aki no ta posibel.

E caso lo wordo trata diabierna proximo 8.30 am orario di Aruba y lo wordo transmiti ‘live’, via website di Hoge Raad der Nederlanden.