Parlamentario Tevreden (MEP): “E marcha diabierna tabata grandi y exitoso”

Marcha pa respalda e pensamento di e comunidad di pais Aruba cu ta contra matrimonio di mesun sexo

ORANJESTAD, Aruba 8 di November 2023: Parlamentario di Fraccion di MEP, Hendrik Tevreden durante un conferencia di prensa dialuna mainta a elabora tocante e dos marchanan cu tabatin durante weekend cu a caba di pasa.

Lider di Fraccion di MEP, a concentra den e marcha contra matrimonio di mesun sexo. Den opinion di Tevreden, e marcha aki tabata un exito y tabata un marcha hopi grandi. El a agrega cu gran parti di pueblo a mustra cu nan ta contra matrimonio di mesun sexo y kier keda na matrimonio tradicional. Nos ta spera cu esaki keda mira como refleho pa locual ta corte di cassacion cual ta cuminsa diabierna awor 10 di november, y cual nos a comprende cu lo sigi cu un veredicto den e prome lunanan di 2024.

E Parlamentario a sigui bisa cu manera Hof mes a bisa, no a scucha comunidad di Aruba papia o expresa riba e tematica, kico nan ta pensa of kico nan kier. “Si bo tuma e marcha como un expression kico pueblo kier y bay midi e dos marchanan cu tabata tin, e ora bo por tuma bo conclusion cu e marcha di mas grandi tabata e marcha contra matrimonio di mesun sexo. Y eynan tambe por mira cu e marcha ey ta respalda e pensamento di comunidad di pais Aruba cu ta contra di e matrimonio di mesun sexo”, Tevreden a expresa.

E marcha aki a wordo yama den corto tempo, sinembargo, e resultado y e acompaňamento di pueblo tabata hopi grandi, a remarca. E grupo aki a entrega un manifiesto na gobierno hunto cu e mas di 18 mil firma. Aworaki, oficialmente tin registra 16.313 firma pa notario y no a termina cu e conteo total. Esnan cu ainda lo kier firma por acudi na diferente misa o iglesia pa haci esaki. Tambe por digitalmente ariba http://bit.ly/YenaEPetition. E firmanan aki ta wordo controla pa notario pa verifica cu nan ta firmanan legal. E firmanan lo sigui wordo recauda pasobra ta kere cu pais Aruba tin mag di vocifera nan opinion riba e tema aki cu sigur ta impacta comunidad grandemente, Hendrik Tevreden a enfatisa. Den un democracia ambos Partido tin derecho di expresa nan opinion y ambos Partido ta haciendo esaki na un forma hopi respetuoso.

Consecuencianan

No por descarta cu e cambionan ora cu kier introduci un ley asina aki, lo ta grandi. Tin hopi implicacionnan cu tin di tene cuenta y dialoga riba nan. E ta mas cu un cambio simplistico, pero sin duda e ta implica cambio riba educacion, salubridad y financiero pa menciona algun.

Algo cu a hala atencion caba ta e declaracion di un representante di un di e gruponan cu ta pro LGBTQIA+ cu a bisa cu ya caba nan ta trahando pa amplia e ley pa cambia nomber y sexo den pasaporte, indicando cu nan lo bay concentra tambe riba loke ta ideologia di genero. E ta nifica cu si scientificamente, biologicamente, bo ta nace como hende homber, pero bo ta sinti cu bo ta un hende muhe, bo lo por cambia esaki den por pasaporte, pensamentonan cu ta hopi leu di loke nos comunidad ta custumbra cu ne riba e ambito legal.

E lidernan religioso a haya un apoyo grandi di comunidad y e marcha tabata asina exitoso. “Mi ta spera cu nos por sigui resona nos bos riba e tematica aki, den respet, den dialogo cu otro. Pero vociferando nos opinion den un manera firme, e Parlamentario a finalisando bisando.