MINISTER ENDY CROES TA FELICITA LIZANNE KELLY CU A SALI DI 5LUGA DEN CAMPEONATO MUNDIAL DI DOMINO NA LAS VEGAS

ORANJESTAD: Recientemente, Minister di Enseñansa y Deporte Endy Croes a ricibi
Lizanne Kelly na Bestuurskantoor. Den nomber di Gobierno di Aruba, Minister Endy Croes a
entrega Lizanne Kelly un Reconocemento di Excelencia cu a sali di 5 luga den Campeonato
Mundial di Domino. Un delegacion di 28 atleta di Aruba Domino Bond a participa contra
mas di 500 hungado di diferente pais, entre otro, Puerto Rico, Venezuela, Rusia, USA, Brazil,
Colombia, Egypto y Costa Rica. E di 19 Campeonato Mundial di Domino organisa pa
Federacion Internacional di Domino (FID) a tuma luga na Las Vegas, di 22 di october pa 26
di october 2023. Lizanne ta forma parti di Ottley’s Strikers DT. Desde su 5 aña di edad,
Lizanne ta hunga domino pa hobby. Actualmente, Lizanne tin 1 aña cu e ta hungando domino
den un forma competitivo. Lizanne ta gradici su famia y amigonan cu a yud’e hunga domino
y su bon amigo Johné Rasmijn, den feliz memoria, cu sin dje e no lo tin e logro aki. Minister
Endy Croes ta gradici Lizanne y ful e ekipo di Aruba Domino Bond pa pone Aruba su
nomber briya na Las Vegas riba plataforma internacional y ta dese’e hopi exito den futuro.
Aruba ta orguyoso di bo. Cu deseo, disciplina, dedicacion y determinacion ta logra.