SOLUCION DEN NOTA DI AVP A HABRI CAMINDA PA UN DIALOGO CU PERSPECTIVA

Na tur istancia y na tur nivel cu e Lider di AVP, mr. Mike Eman cu consehero di fraccion, Wendrick Cicilia, a presenta e nota di AVP na Den Haag Hulanda, pa converti debe di Aruba na Hulanda den un fondo di inversion, por a  sinti simpatia y hasta admiracion pa locual mandatarionan Hulandes a yama “een creatieve oplossing”. Tin cu hasta a agrega cu e pensamentonan mas profundo aki ta locual “wij altijd van Eman waarderen”.

DI VREDESPALEIS PA TORENTJE

E promer caminda cu mr. Mike Eman a consulta riba e tema aki ta serca e experto constitucional respeta den Reino, actual Minister di Esatdo, anterior cabez di Raad van State y Minister den hopi gabinete cu un variacion grandi di cartera tabata mr. Piet Hein Donner. For di Vredespaleis a resona un signal positivo: e nota cu Eman a presenta lo por ta un caminda alternativa.

Tambe den het Torentje e tema aki a keda planta y Promer Minister Mark Rutte no unicamente tabata tin e cortesia pa ricibi e lider di oposicion, pero tambe a duna cara na Prensa pa splica kico e a combersa cu mr. Mike Eman. Por a nota un synergia di amistad y tambe di contemplacion riba locual a worde presenta y papia. Un ambiente cu ta crea perspectiva pa mas deliberacion riba solucion pa un problema grandi cu por bira un fundeshi firme pa inversionnan den futuro pa Aruba, algo cu CAFT a remarca recientemente cu ta haci hopi falta na Aruba.

NOTA CU SOLUCION

E nota aki di Fraccion di Partido di Pueblo Arubano AVP den Parlamento, ta ensera un proposicion fuerte pa un areglo amicabel pa e forma di paga bek e fiansanan di Hulanda na Aruba. E proposicion inovativo aki a wordo insprira pa e bunita areglo entre Cape Verde y Portugal, den cua e debenan di Cape Verde na Portugal ta wordo converti den inversionnan den iniciativanan pa un desaroyo sostenibel na Cape Verde. Dia 22 di juni 2023 Cape Verde y Portugal a firma e acuerdo historico aki cu ta sirbi como un ehempel cla pa otro paisnan. 

Fraccion di AVP ta propone pa e gobierno nobo di Hulanda crea un fondo pa inversion nobo hunto cu Aruba, manera e ‘Fondo Desaroyo Aruba’ cu a demostra di ta sumamente exitoso y cu a wordo maneha door di Aruba Investment Bank. E meta principal di e areglo ta pa e pagonan di e debe di Aruba na Hulanda bay den e fondo nobo ‘Aruba Investment Fund’, cu mester wordo crea y pa esaki wordo maneha door di un instituto renombra manera Aruba Investment Bank. E fondo aki lo cai bou di supervision y control di representantenan di tanto gobierno di Aruba como di gobierno Hulandes. 

DIALOGO CU PERSPECTIVA

Locual a resalta durante e reunionan di trabao di Eman na Hulanda ta no únicamente cu portanan a habri cu hopi calor, aprecio y respet, pero tambe un deseo grandi pa por yega atrobe na dialogonan constructivo cu ta basa riba visionan bon pensa den cual tur dos pais, Aruba y Hulanda, por mira un futuro cu perspectiva prometedor. Sin duda e momento aki lo bai den historia como un punto di referencia ta con mester atende pa yega na cooperación strategico.