MINISTER ENDY CROES A ASISTI NA PREMIER DI PELICULA OTRO BANDA DI E CAM NA THE MOVIES IMAX NA GLORIA

E pelicula ta forma parti di e campaña di conscientisacion Habri bo Wowo pa crea consciencia pa traficacion y contrabanda di hende.

ORANJESTAD: Dia 18 di october cu ta Dia Nacional Contra Traficacion di Hende, Minister di Enseñansa y Deporte Endy Croes a asisti na premier di e pelicula Otro Banda d e Cam na The Movies IMAX na Gloria Aruba. E pelicula Otro Banda di e Cam ta continuacion di e pelicula Otro Banda di Laman y ta parti di e campaña di conscientisacion Habri bo Wowo cu a lansa na mei di aña 2021. Den Otro Banda di Cam ta ilustra traficacion di hende den forma moderno, unda cu un traficado ta manipula, gaña, y forsa un persona pa haci actonan sexual dilanti camara. E pelicula aki ta produci pa e compania local Freeway Agency, bou encargo di Coordinatiecentrum Mensenhandel Mensensmokkel Aruba (CMMA) pa trece conscientisacion riba e fenomeno di traficacion y contrabanda di hende. Minister Endy Croes ta expresa cu esaki ta tremendo proyecto y sigur un tremendo mensahe pa trece consciencia den nos comunidad tocante traficacion y contrabanda di hende. Esaki ta un problema global y e ta pasa na Aruba tambe. Gabinete Wever-Croes II ta comprometi pa combati e crimen aki y p’esey ta ta vital importancia pa nos trata e tema aki.