Secretario General di MEP: Prohibi pa lubida

CON E MALANDRONAN DI AVP SPEED Y PATRICK PASKEL A RANCA 8 MIYON DI PUEBLO NA UN MANERA CRUEL Y A DAL RDA 500 MIL FLORIN ABOU

Secretario General di MEP ta recorda e añanan di gobernacion di AVP 2009-2017 no por wordo lubida sin mas. Esaki ta e gobernacion cu mas a haci daño na Pais Aruba. Hopi ta esnan cu a “djodjo” cu placa di pueblo y segun fuente no a cumpli cu pago di belasting tampoco. Dos di e “djacanan” grandi ta Speed Andrade y Patrick Paskel. 

Speed cu Patrick Paskel a cobra 8 miyon di Pais Aruba:

Speed Andrade y Patrick Paskel ta amigo personal y di cas di Mike Eman. Tur hende por corda con e duo aki a biaha cu Mike Eman rond mundo riba custia di pueblo. Nos por corda con nan tabata saca potret por ehempel na Rio Hacha hasta disfrasa na comando. Asina nan bida dushi tabata pa 8 aña largo. Nan a ranca y chica e pueblo aki na un forma cruel.Tur parlamentario a ricibi copia oficial di e pagonan di Departamento di Financia cu a wordo someti na Speed y Patrick entre 2009 pa 2017. Riba diferente compania nan a strica placa haciendo propaganda pa varios minister y a wordo paga un suma total di 6 miyon florin. Esaki a bin di placa di pagadonan di belasting. Banda di a cobra e suma aki, nan tabata strica placa na un manera desformal di “utilities”, entre otro, ELMAR, SETAR, Lotto pa Deporte y na un manera di criminal for di RDA. Aki nan a ranca mas di 2 miyon adicional.

Recordatorio riba e Rapport Forensico RDA:

Tin un rapport di un investigacion forensico cu a wordo haci riba RDA y aki a produci un total di 20 miyon di malversacion. E rapport aki ta na Ministerio Publico.cKico a resalta den e rapport aki? RDA tampoco a scapa e dos “djacanan” Speed cu Patrick. Riba pagina 139 di dicho rapport bou di e titulo “Bevindingen Advertentie en Marketingkosten” e nomber di e djacanan ta bin dilanti. Aki ta para cu directornan di companianan cu a cobra y forma parti di e corupcion aki ta, entre otro, Patrick Ronald Paskel di Tera Group (15 di december 2010) y Xiomara Miloushka Paskel (casa di Patrick), kende a bira director desde 1 di januari 2016. Di acuerdo cu e rapport, Patrick a ricibi placa na un forma di criminal. Declaracionnan di tanto Koolman y mevrouw Croes riba pagina 139 ta splica “dat er geen schriftelijke contract is aangegaan”. Den admistratie a ricibi un solo e-mail data 2 di october 2016, cual a wordo manda pa Francie Solognier y a traves di e e-mail aki e pagonan cuantioso a bay pa Patrick Paskel. Rapport a yega na un suma adicional di 500 mil florin. A resalta cu Patrick a cobra AWG. 37.592,- pa un welcome receptie, AWG. 23.211,- pa traha un video di reopening di refeneria. Un refeneria cu nunca a habri. Sinberguensa tot en met!  A cobra AWG. 10.918,- pa WC nan portatiel pa un fiesta di reopening.  Patrick a cobra AWG. 49.996,- pa un proyecto di Algen dia 12 di september 2017 2 siman prome cu eleccion y pa su mañan dia 13 di september a bolbe cobra AWG. 49.996,- pa mesun proyecto. Esta 100 mil den 2 dia. Tur esakinan ta skirbi den e rapport forensico, pues nos ta solamente repasa y splica pueblo di e dos sinberguensanan Patrick Paskel y Speed Andrade. Lo no ta mal idea pa Ministerio Publico tira un bista den e rapport aki paso imposibel hende saca of horta asina tanto placa sin ningun tipo di contract riba proyectonan fantasma.  Esaki ta solamente pa recorda pueblo con Mike Eman a traves di su malandronan tabata chica placa di e pueblo aki. Prohibi pa lubida!