MINISTER ENDY CROES A SALI PA UN BIAHE DI TRABOU NA MERCA, UNDA CU TA BAY NEGOSHA MOU CU ALGUN COLLEGE Y UNIVERSIDAD

ORANJESTAD: Dialuna atardi, Minister di Enseñansa y Deporte Endy Croes a sali di biahe pa Merca, unda ta bay negosha MoU cu algun college y universidad. Primeramente, Minister Endy Croes lo acudi na Howard University na Washington DC y mesun dia parti merdia lo tin un reunion basta extenso cu Montgomery College. Den pasado, Aruba tabatin un MoU caba cu Montgomery College, den cual a caduca. Actualmente, Minister Endy Croes ta bay negosha un acuerdo mas amplio. Montgomery College tin un programa cu por yuda traha den e parti di innovacion y ICT hopi di cerca cu Colegio EPI. Siguientemente, parti di atardi e mandatario di Enseñansa lo tin un otro reunion cu secretaria di estado di Maryland, Sra. Suzanne Lee.  E dia siguiente, Minister Endy Croes lo reuni cu Embahada Hulandes Sr. Renske Heemskerk. Despues di esaki, Minister Endy Croes lo sigui pa un reunion hopi interesante na Baltimore y lo termina na University of South Carolina, caminda tin intencion grandi pa amplia un contrato existente. Primordialmente, pa trece dilanti e vision cu tin pa “sport tourism”. Minister Endy Croes a indica cu a pidi un pakete special pa “master level” den sport management, asina por aloca 8 of 10 studiante cu kier pa yega e nivel aki y den futuro por yuda desaroya e parti di “sport tourism” na Aruba. Pues, un biahe cu un skema di reunion basta extenso cu diferente college y universidad di Merca. Di regreso na Aruba, Minister Endy Croes lo amplia riba e resultado di e biahe di trabou aki.