Minister Dangui Oduber : MINISTER DI SALUD PUBLICO TA SUCU CHALLENGE BO PERSONA! 

ORANJESTAD –Diamars mainta Minister di Turismo y Salud Publico sr. Dangui Oduber y su ministerio ta cuminsa cu e “Sucu Challenge Nacional”, den conexion cu Dia Mundial di Diabetes y grupo di Nutricionista y Diestista Arubano (NDA) ta organisa e challenge di “Kick out sucu agrega pa1 siman” 

Den e campaña di “Kick out sucu agrega pa 1 siman” ta pa conscientisa e pueblo di Aruba di e peligernan di consumo di productonan y bebidanan cu sucu agrega. Diferente instancia manera; DVG, IBISA, IMSAN, Dr Horacio Oduber Hospital (HOH), Wit Gele Kruis (WGK), Healthy Lifestyle Center (HLC), Fundacion Diabetico Aruba (FDA) y diestistanan priva ta bini hunto pa duna informacion na comunidad :  

1. Di kico ta sucu agrega? 
2. Motibo pa evita sucu agrega? 
3. Con pa reconoce productonan cu ta contene cantidad halto di sucu agrega?
4. Kico ta e beneficionan pa salud di no come cantidad halto di sucu agrega? 

Ministerio di Salud Publico su meta ta pa Aruba por yega na un calidad di cuido mas eficiente, mas efectivo y mucho mas sostenibel. E campaña “Kick out sucu” ta den cuadro di e maneho di prevencion poni como punto central y pa sigui conscientisa Aruba riba e riesgonan di uso excesivo di sucu agrega pa nos salud.  

Minister Dangui Oduber ta invita henter pueblo di Aruba pa traha na yega na un curpa y mente mas saludabel y ta challenge bo persona pa participa cu e campaña di 14 pa 20 di November. Challenge bo mes, bo amiga/amigonan, famia y coleganan pa participa.  

Participa uzando #sucuchallenge