SR. ESAIAS “VACHI” WERLEMAN A RICIBI RECONOCEMENTO DI BALUARTE DEPORTIVO 2022
ORANJESTAD: Premio Excelencia den Deporte tabata un anochi magico y inolvidabel unda a reconoce e atletanan cu mas a destaca durante aña 2022 y a rindi homenahe na nos baluartenan deportivo. Un otro baluarte deportivo cu a ricibi reconocemento durante e gran anochi aki ta Sr. Esaias Efrain Werleman. Durante e ceremonia special aki Sra. Nicole Hoevertsz secretario general di Comite Olimpico Arubano y vice presidente di Comite Olimpico Internacional a haci entrega di e reconocemento na Sr. Vachi Werleman.
Sr. Esaias Werleman, miho conoci como “Choplop” a cuminsa hunga baseball cu 8 aña den Little League. Na edad di 17 aña Vachi a cuminsa hunga den dobel A cu e team di Aruba Video Center. Sr. Werleman a hunga den e team di Malboro, su posicion tabata catcher cual el a eherece pa 7 aña. Tambe, Sr. Werleman a hunga den Copa Antillana cu ekipo di Malboro. Despues cu Sr. Werleman a bay biba na Hulanda e tabata milita den e ekipo di Smith & Dorlas Quick. Alabes, Sr. Vachi Werleman a hunga 14 aña softball na Hulanda. Durante temporada di vakantie di baseball, Sr. Werleman a dirigi un team mix di softball Soft Power, cu a keda invicto pa shete (7) aña consecutivo. Despues cu Sr. Vachi Werleman a regresa Aruba, el a para umpire pa Little League y pa Umpires UNI. Te cu e dia di awe ainda Sr. Werleman ta sigui haci e trabou aki cu e mesun amor y energia cu Dios ta dun’e. Pa conclui, Minister Endy Croes ta felicita Sr. Esaias Werleman cu su reconocemento bon mereci alabes ta gradicie pa contribui den e desaroyo di deporte di Pais Aruba.
