Parlamentario Alvin Molina (MEP) : Firma MoU no tin balor si no tin accion su tras.

United Farmers of Aruba (UFA) semper ta bonbini den parlamento pa expresa nan idea- y inkietudnan. Specialmente mirando cu ta e cunukeronan (farmers) lo bai carga nos pilar economico, esta agricultura. E cunukeronan ta esnan cu lo percura pa pueblo por tin cuminda di calidad halto na un prijs rasonabel. Loke no ta e intencion ta cu cada tanto luna UFA mester bin bek parlamento cu e mesun inkietud- y ideanan, sin cu tin un avance den e proceso pa logra e meta.

Un bes mas UFA a informa nos cu no tin mehoracion den sector primario. Na juli 2022 a firma un Memorandum of Understanding (MoU) entre UFA, Santa Rosa y Minister di Naturalesa. Na juni 2023 a firma un MoU entre e 6 islanan den Caribe pa colabora cu e industria innovativo aki. Awo na november 2023 nos por mira cu ni e necesdidadnan basico no tin mehoracion. Ainda awa ta limita y mucho caro y e tarifa di coriente ta extra halto. Mientras, cu por ehempel, e hotelnan si ta gosa di un tarifa reduci. No ta permiti pa pone solar panel riba tereno “huurgrond”. Pa haya tereno huurgrond pa planta ta casi imposibel. Ta hopi dificil pa haya financiamento, ta dificil pa haya trahado- y expertonan (di exterior), no ta permiti pa pone un oficina, baño of un luga pa trahadonan sinta come riba e tereno. Importa producto y material ta un caminda di cruz, etc etc. E circunstancianan no ta mehora pa hacie faborabel pa engrandece un pilar economico nobo.

No ta necesario pa skirbi un MoU pa nos sa kico ta e problemanan cu ta stroba e economia di Aruba pa diversifica y bira mas fuerte. Ta accion mester di e minister encarga cu sector primario pa activa su coleganan pa tuma e accionnan necesario. Mi a haci e preguntanan aki na Gobierno di Aruba, sperando contesta.