Parlamentario Darlaine Guedez-Erasmus (MEP): Luna di november ta pone hopi enfasis riba programanan pa matrimonio stabiel

ORANJESTAD, Aruba 16 November 2023: Na luna di september e aña aki, e Comision Vision Pedagogico a organisa pa prome biaha, un congreso special pa pareha yama “Cende e Chispa di bo Relacion”.

E congreso aki ta pa parehanan por bini hunto pa haya hermentnan caminda nan por uza pa asina sa con pa actua diariamente y asina por surpasa e retonan aki di un miho forma, asina Parlamentario di Fraccion di MEP, Darlaine Guedez-Erasmus a trece dilanti. Aruba ta un di e paisnan den e top mundial cu mas caso di divorcio. Separacion ta pone tur cos cambia den un hogar. E insiguridad, parti financiero, custumbernan, tempo di calidad, structura. E cambio aki ta di hopi impacto riba e pareha cu ta separa, pero sigur riba e yiunan cu tin cu deal cu e situacion aki.

Pa mantene e famia uni, sigur mester traha primordialmente riba relacionnan sano. Uno sigur cu ta tende semper ta e comunicacion den pareha y cu parehanan por biba den amor, paz y union. Sigur cu esaki ta di bon refleho riba nan yiunan tambe. Un hogar cu su fundeshi fuerte ta lanta yiunan fuerte pa participa den nos comunidad, a remarca.                     

Den luna di november tabata tin diferente programa pa parehanan. Dia 2 di november 2023 den e bario di Noord a sigui cu e programa ‘Cende E Chispa di bo relacion’, cual a wordo bon atendi y cu lo sigui den e otro barionan di Aruba pa asina haci mas facil pa habitantenan por acudi. 

Iglesia Vida Ambundante Aruba tambe a organisa un curso “Ready to Wed” pa preparacion pa parehanan cu ta bay casa. Di cual ta hopi necesario na Aruba, pa asina relacionnan por dura pa semper. Tambe 25 november 2023, Hesus Biña Nobo lo tin nan Conferencia ‘Bulletproof Marriage’ cu ya ta conoci cu tur aña e ta wordo organisa. Sigur un bunita conferencia y cu ta duna bon fruto, Guedez- Erasmus a remarca. “Mi ta contento di mira cu e organisacionnan ta pone hopi atencion na duna hermentnan pa asina matrimonionan por keda funciona bon.

Programanan asina sigur lo ta di gran aporte pa nos sociedad. Unda nos por mira cu mama y tata ta keda hunto y esey ta nifica cu famianan ta keda feliz hunto y stima otro. Asina nos ta sigur cu nos generacion ta keda kere den matrimonio”, Parlamentario Darlaine Guedez-Erasmus a finalisa bisando. Mi persona kier motiva parehanan pa asisti na e programnanan aki, paso nan ta bon pa abo y bo persona pero tambe pa e comunidad di Aruba.