Prome Minister Evelyn Wever-Croes: PROME MINISTER A REUNI CU COMMANDANT VAN WIJK

Diamars 15 di November, Prome Minister Evelyn Wever-Croes a reuni cu Commandant di Marinierskazerne na Savaneta T.A.H. Van Wijk. Esaki tawata un reunion hopi informativo di ambos banda na unda cu a elabora riba desaroyonan nobo di interes pa Aruba y Hulanda. Defensie tin 3 tarea principal: defende Reino, combati transporte di droga y otro ilegalidadnan riba lama y asistencia den caso di calamidad. E cooperacion entre Gobierno di Aruba y Marinierskazerne ta hopi estrecho riba tur tres tarea.

Marinierskazerne ta percura tambe pa traha riba e ser humano mas hopi cu por como tambe den e area di naturalesa y e aspecto di conservacion di naturalesa.

Prome Minister ta gradici señor Van Wijk pa tuma tempo y informa Gobierno riba trabou y estrategianan especialmente pa trece mas siguridad pa nos pais. Hunto lo sigui traha pa estrecha e cooperacion mas ainda pa tur proyecto y programa di formacion pa nos hobennan y como tambe hende muhe wordo enforsa mas.