Parlamentario Marco Berlis (MEP) : Kico ta ideologia di genero?-Parti I

E ideologia destructivo cu ta invadiendo nos comunidad atraves di un agenda scondi

Hopi hende no ta siguiendo e desaroyonan di e “ideologia di genero” den exterior di cerca y pesey e no ta bati un alarma den e mentenan Arubiano. Originalmente ideologia di genero tin di haber cu actitudnan den rolnan apropia, derechonan, y responsabilidadnan di muhe y hombernan den sociedad. E concepto por refleha e actitudnan aki di un forma general of den un area specifico, manera esun economico, familiar, legal, politico of/y un area social. Mundialmente pa miles di aña e ideologia di genero semper a drei rond di hende muhe y homber. E ideologia di genero original hopi biaha tabata enfatisa y lucha pa hende muhe haya e mesun derechonan, oportunidadnan y pago den e mundo secular y profesional.

Ideologia di genero global.

For di basta aña pasa e movemento di Ideologia di Genero mundial aki a bin ta agresivamente promove agendanan cu ta purba na redefini e realidad di identidad di genero, e realidad di un famia tradicional, e realidad di matrimonio, e realidad kico ta un homber y un muhe, ta cuestiona e realidad biologico, di sciencia y naturalmente e realidad di religion, den nos sociedad. E movemento di “ideologia di genero” global y local actualmente ta bringando pa derechonan igual pa parehanan homosexual por casa, ta bringando scondi pa cambia leynan, maneho di gobierno y educacion di nos scolnan cu lo acomoda nan agenda y un realidad nobo di bida y famia nos desconoce actualmente na nos pais. Esaki ta un realidad caba na Europa, Merca, Canada y varios paisnan mundial. E agenda aki ta conoce resistencia grandi di mayornan, di miembronan mes di LGBTQ+, gobiernonan, y ciudadanonan rond mundo cu no ta acepta pa nan tradicionnan, famia y yiunan wordo indoctrina y afecta pa esnan cu kier redefini nan cultura.

Con LGBTQ+ di Merca ta splica identidad di genero riba nan website

Riba e website nan ta splica cu identidad di genero ta basa riba loke bo ta “sinti” y no pasobra bo a nace cu cierto tipo di organo sexual. E realidad gay no ta algo nobo y ta wordo acepta den nos sociedad. E problema cu e lista di “generonan” ta cu actualmente tin un cantidad sin limite di identidadnan di genero. Kico cu abo sinti bo kier ta, bo por ta. Tin website di esnan pro e ideologia di genero aki ta menciona mas di 100 genero cu bo por identifica cu ne. Pa ilustra e confusion grandi cu nan miembronan ta acapara cu ne, por ser mira den e cantidad creciente y identidadnan sin limite cu ta existi tur rond di mundo. Identidad di genero ta mas bien enfatisa con abo ta “expresa bo mes, relata na bo curpa y kier wordo percibi.” E problema ta awor cu hende tambe a cuminsa identifica como cacho y ta bisti disfras di cacho, ta biba den nan cas den un cas di cacho, comiendo cumind’I cacho y ta blaf. Asina bo ta haya hende cu ta identifica como cabay, pushi, entre otro. Ta na unda e cos aki ta caba?

Agenda di ideologia di genero ta visibel

Desiree Croes a splica den prensa durante di e “Diversity Walk” cu nan ta bezig ta preparando pa pronto tin e derecho pa cambia bo “acta di nacemento” si bo tabata un mucha muhe, por cambi’e

pa mucha homber! Acaso e filosfia di esnan pro e ideologia aki no ta bisa cu sexo y genero ta dos cos diferente?

Awor nos por wak cu esaki no ta e caso. Ademas, a constata y ta sigui constata cu lesnan pro ideologia di genero ta keda presenta scondi na nos muchanan, sin cu mayornan ta na altura. Esaki te mesun modus operandi cu e presentacion di e “Cashi Magico” sin cu mayornan tabata na altura. E agenda aki no conoce respet pa niun tradicion, tin religion-fobia, tradicion-fobia, y ta impone su mes si bo ta gusta of no. Nos por wak e actitud arogante di Parlamentario Miguel Mansur con e ta sali insulta y lastra clero catholico di Aruba y Corsou sin piedad, ta lastra tur religion, denominacion, tradicion, ta insulta principionan di hende y ta defende y hustifica su actitud baho cueste loke cueste. Miguel Mansur no por soporta critica mescos cu esnan cu ta pro ideologia di genero pasobra e ora segun nan tur hende tin homofobia. Pronto mi lo sigui elabora riba e tema aki.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo Parlamentario y sirbido di pueblo na bo ordo semper!