Hospital ta conta cu mas hospitalisacion pero menos operacion

Estadisticanan pa luna di oktober 2023 di HOH

Horacio Oduber Hospital un bes mas ta saca su estadisticanan pa loke ta luna di oktober 2023 cual ta brinda transperancia na comunidad di Aruba. E cifranan aki ta pa duna un indicacion di loke ta sosode na nos Hospital pa loke ta cuido, e parti di diagnostico y tambe donacion di sanger.

Durante luna di oktober 2023 a hospitalisa 833 pashent cual ta mas cu na luna di september cu tabata 786 pashent. Di e 833 pashent hospitalisa un total di 471 a drenta cu emergencia. Cada pashent cu a hospeda den Hospital a keda un promedio di 4,3 dia y durante luna di oktober e ocupacion di cama tabata na 91%.

A tuma luga 552 operacion cual ta 70 operacion menos cu na luna di september. A nace un total di 80 baby (39 mucha muhe y 41 mucha homber) na oktober. Y tambe na oktober nos heroenan a pasa Bloedbank y a haci un total di 265 donacion di sanger cu ta 51 donacion mas cu na september.

Departamento di Emergencia a mira na oktober un total di 2.629 pashent, cual un total di 42% NO tabata pashent cu caso di emergencia.

Specialistanan den servicio di HOH a haci un total di 6.010 consulta cu pashent na e diferente policlinicanan na oktober. Departamento di Radiologia a haci un total di 4.627  test manera CT scan, MRI y mas. Un total di 11.389 persona a bay departamento di LABHOH pa haci nan test cual ta 241 persona mas cu na luna di september.  Y un total di 822 pashent a sali for di Hospital.

Danki na tur cu ta brinda cuido safe y cordial na Hospital 24/7 demonstrando diariamente cu HOH semper t’ey pa comunidad y tambe turista!