Parlamentario Hendrik Tevreden ta exigi un disculpa publico di Parlamentario Arthur Dowers di AVP

“Na un manera baho y sin nivel el a yama Minister di Finansas pa bestia”

ORANJESTAD, Aruba 16 di november 2023: Lider di Fraccion di MEP, Hendrik Tevreden durante rueda di prensa di diaranson mainta a reacciona riba Parlamentario di Fraccion di AVP, Arthur Dowers, kende den un forma baho a insulta Minister di Finansas Xiomara Maduro door di su discurso durante un encuentro na Hulanda riba abolicion di sclavitud y e trato cu Aruba ta hayando for di Hulanda.

El a bisa cu Parlamento di Aruba hopi biaha a vocifera su opinion ariba e tema aki di abolicion y cu Hulanda mester ta mas sincero den momento cu ta trata na pidi disculpa na e islanan, principalmente ora ta mira con Hulanda a bin ta trata y negocia cu gobierno di Corsou, pero tambe cu gobierno di pais Aruba.

Tevreden a bolbe enfatisa e hecho cu Aruba a haya un ‘strafrente’ cu alfinal lo resulta den mas o menos Afl. 300 miyon extra cu tin di bay paga pasobra Aruba ta bringa pa mantene su autonomia financiero, como Gobierno, Parlamento, y como Pais.

Minister di Finansas a haci un apelacion profundo na e sala na momento di su discurso, pero tambe na henter Reino Hulandes cu a sigi esaki, pa ban reflexiona con nos ta trata cu otro den Reino y Hendrik Tevreden a señala cu esaki a cay den bon tera cerca hopi. Comentarionan di por ehempel, John Leerdam, cu ta encarga cu e museo pa loke ta abolicion di sclavitud den Reino, a indica cu Minister di Finansas a bisa locual cu hopi hende ta pensa y el a trec’e di un manera hopi diplomatico y corecto.

“E mensahe aki, nos di Parlamento, sigur, tabata warda pa basta tempo pa scucha di parti di Gobierno y nos ta haya lastima y ta condena e expresionnan di Sr. Dowers pa uno, yama Minister di Finansas publicamente den un entrevista na radio, como bestia y bisa tambe cu e discurso cu Minister di Finansas a hiba na Hulanda ariba e tematica di abolicion di sclavitud y e trato cu nos ta ricibi den Reino, ta un discurso di papia coy bestia”, Parlamentario Tevreden a declara.

Relaciona cu e insulto aki, Parlamentario Tevreden ta opina cu sr. Dowers a crusa e liña y ta mirando cu ya for di basta tempo su actitud ariba por ehempel, e criticanan riba Ministerio Publico, y e sistema huridico na Aruba ta den un decadencia total. Y ta parce cu pa tur loke ta pasando den nan partido AVP, Dowers ta buscando un hende pa culpa, a bisa.

Mi no a spera e comportacion aki di sr. Dowers y sigur no pa a yega na un nivel asina abao pa yama Minister di Finansas pa bestia. Cu politicamente bo gusta sra. Maduro of no, e ta un dama cu ta luchando pa pais Aruba, haciendo lo corecto den su trabou, y hibando un mensahe pa purba trece un reflexion cu ta hopi necesario den Reino, lider di Fraccion di MEP a expresa.

AVP mes na 2014 a indica cu Hulanda no a tuma e postura di ‘Dominee’ cu nan ta pretende di ta, awe diripiente AVP a cambia di opinion? Mientras cu Parlamentario Dowers ta opina asina y ta contra e postura di Gobierno actual, tin profesornan Europeo Hulandes manera Profesor Nicolaï, Eerste Kamer leden sr. Hartog, sr. Crone y tambe rofesor Hoogers, cu tin e pensamento cu locual cu Hulanda ta haciendo ta robes y nan tur ta condena e hecho con Aruba ta wordo trata den e negociacion aki di un fiansa di pandemia. 

“Nan di partido AVP cu a yama Hulandesnan pa verkrachters, nan di partido AVP cu a bay sinta yora bao di palo  y reclama pais Hulanda, awe bo ta mira cu nan ta bin dilanti pa rasonnan politico, pa rasonnan pa scapa nan partido AVP cu ta deteriorando y bayendo abao, yama Minister di Finansas pa bestia y bagatalisa e discurso cu el a hiba como cos di bestia”, e Parlamentario di Fraccion di MEP a indica. Wereld op zijn kop.

Finalmente, Tevreden a declara cu e nivel aki nos no tin cu sigi cu ne na pais Aruba. Mester percura pa cambio di inmediato y nos di Partido MEP ta exigi un disculpa publico di Sr. Dowers na Minister di Finansas como persona, como dama politico. Los di bo ideologia y pensamentonan contrario como politico, bo ta tratando aki cu un persona, y den e rol como parlamentario bo no por yega na e nivel eynan pa yama e señora aki como bestia. Sr. Dowers tin di tuma esaki na serio, pasobra pueblo mes por mira y scucha kico e a declara publicamente y condena e mentalidad, actitud y arogancia aki cu ta biba cerca e politiconan di AVP.