Prome Minister Evelyn Wever-Croes: Dia Internacional di Derechonan di Mucha

UN DIA DEDICA PA HONRA E DERECHO FUNDAMENTAL DI NOS TESORONAN DI MAS BALIOSO, NOS MUCHANAN

Dia Internacional di Derechonan di Mucha ta wordo celebra mundialmente dia 20 di November. Esaki ta un dia dedica pa honra e derecho fundamental di nos tesoronan di mas balioso, nos muchanan. Riba e dia aki, pa trece conscientisacion riba nan derechonan, laga nos refleha riba nos responsabilidadnan como adulto pa brinda nos muchanan un futuro briyante y nos debernan di respeta, proteha y yuda nan derechonan.

Muchanan ta futuro di nos nacion. Den cada mucha nos ta mira e promesa di dianan mas briyante nos dilanti. Y ta nos deber como adulto, pa asegura cu e promesa aki bira un realidad pa cada mucha. Nos muchanan ta e futuro arkitectonan di nos pais, y nos tin e responsabilidad pa pone den nan man e hermentnan, oportunidadnan y un base unda cu nan potencial por mira luz.

Prome Minister Evelyn Wever-Croes a duna di conoce cu Gobierno di Aruba ta reafirma su compromiso na e principionan di e tratado internacional cu a wordo adopta pa Asamblea General di Nacionnan Uni na 1989 na unda cu ampliamente ta splica e derecho di tur mucha bou di e edad di 18 aña cu ta inclui bida, salud, educacion y proteccion contra explotacion y abuso. “Prioridad di Gobierno ta pa cada mucha crece sin miedo y sin discriminacion. Y hunto como un sociedad respeta cu ta kere den su muchanan, nos ta lucha pa logra un ambiente sigur, di harmonia, amor, sin violencia, abuso y discriminacion pa nos ciudadanonan menor”, Prome Minister a remarca.

Loke awe nos ta duna nos muchanan, mañan nan lo entrega na nan yiunan. Si nos inspira compacion, amor, dedicacion, resiliencia y innovacion awe na nos muchanan, mañan nan lo bira e agentenan di esakinan.

“Laga nos celebra e Dia Internacional di Derechonan di Mucha cu un meta renoba, un compromiso renova, pa proteha e derecho di cada mucha. Esaki ta e inversion di mas grandi cu un pais por haci pa su bienestar, igualdad y prosperidad pa un futuro briyante. Laga nos construi un mundo na unda cada mucha ta eleva y su derechonan ta wordo reconoci, manteni y honra”, Prome Minister Evelyn Wever-Croes a expresa.