Parlamentario Marco Berlis (MEP): Dia Internacional di Mucha

20 di november, ta Dia Internacional di Mucha. E fecha aki no a wordo estableci djis pa tin un dia mas pa celebra mucha, sino pa recorda nos cu e muchanan tin derechonan. Muchanan ta e futuro di nos pais y ta pesey mes nos mester brinda nos muchanan tur e proteccion, educacion y guia cu ta posibel pa nan por crece bira grandi y bira adultonan responsabel. Esaki kiermen cu nos mester conoce e derechonan aki y sigura cu semper e muchanan por ta gosando di esaki. Yudando y educando nos muchanan di un edad hoben nos por inspira y establece principionan fuerte den nan pa asina nan tambe por ta mayornan y lidernan responsabel den nos comunidad.

Proteccion di nos muchanan a conoce un mehoracion substancial

Proteccion di nos yiunan mester keda un prioridad semper. Den cuadro di esaki, e Gobierno actual a demostra seriedad den accion poniendo e siguridad di muchanan central. Pa menciona algun:

• Sociaal CrisisPlan a wordo instala na 2018 door di Gobierno for di unda varios proyecto y departamento a nace.
• Codigo di Proteccion a wordo aproba pa Parlamento na 2019 y a drenta na vigor.
• Parlamento a aproba e aumento di diferente castigo den ley contra abuso (sexual) di menor na juni 2020.
• Gobierno ta construyendo e Family Justice Center den Playa, unda lo tin Family Justice Center, Slachtofferhulp y e medico forensico (cu prome biaha Aruba tin) bou un solo dak. E edifico lo tin: verhoorruimtes, verhoorkamers, kindvriendelijke ruimtes, studioverhoor, regie kamer, ophoudkamers verdachte, Ccmera beveiliging, intercomsystem, y letsel ruimte forensisch arts. Esaki lo yuda victimanan di violacion y yuda acumula evidencia contra e abusadonan pa asina hiba nan corte pa sentencianan cu castigonan fuerte.
• Ombudsman a keda instala pa coalicion, aunke oposicion a opta pa vota CONTRA di e ley di Ombudsman.
• Departamento di Mucha y Hoben a keda formalisa na october 2022.
• Desde 2022 tur rechercheur di Jeugd- en Zedenpolitie (JZP) ta certifica pa verhoor mucha y asina conduci miho investigacion.
• A bin cu e campaña nacional ‘MI MESUN HEROE’, un campaña contra di abuso di mucha den forma di un serie.

Gobierno a actua rapidamente y a keda consecuente riba e topico di proteccion pa nos muchanan. Esaki ta aplaudi, ya cu esaki ta algo cu ta biba hopi den pueblo y ta un logro importante pa nos tur. E cambionan cu Parlamento a aproba y cu Gabinete Wever Croes I & II a introduci ta historico y ta prome biaha cu ta trahando asina duro den asina poco tempo pa garantisa e bienestar di nos muchanan.

Nos muchanan ta vulnerabel y mester salbaguardia nan inocencia y salud mental

Nos tur ta compronde cu ora muchanan ta chikito, hasta ora nan curpa cuminsa cambia cu pubertad, nan ta vulnerabel ainda. E ta importante pa den e proceso aki di vulnerabilidad nos muchanan

wordo protegi di cualkier influencia y manipulacion cu por afectanan emocionalmente y mentalmente. Ta cada dia mas importante pa mayornan papia cu nan yiu, duna nan informacion y educacion adecua riba bida na momentonan y un edad apropia. Haci esaki prome otro hende bin cu mal intencion. Mirando specialmente kico ta pasando actualmente den nos sociedad y den mundo en general, nos mester cuida nos muchanan mas cu nunca. Asumiendo nos responsabilidad como mayor, no ta solamente provee alimento pa nan, pero tambe e amor, educacion y formacion necesario na cas pa nan por desaroya den un hoben y adulto madura y responsabel den nos comunidad.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!