Parlamentario Shailiny Tromp-Lee (MEP): Dia Internacional di Derecho di Mucha ta keda un dia importante pa celebra

Dia 20 di november ta un dia hopi importante. Un dia universal caminda nos ta celebra nos muchanan, nan derechonan y alabes ta conmemora adopcion/firmamento di e Declaracion Universal di e Derechonan di Mucha cu a tuma lugar na 1959. Alabes nos ta recorda cu riba e fecha aki na aña 1989 e tratado di Derechonan di Mucha a keda aproba cu e meta pa protege tur mucha aki na mundo.

Na aña 2001 Aruba tambe a firma e tratado aki y a haci e compromiso pa proteha e desaroyo di e mucha den su totalidad. E Tratado aki ta papia di un set di derecho, cu ta inclui entre otro aspectonan di salud, enseñansa, recreacion, como tambe e bida familiar, proteccion contra violencia y discriminacion y cu cada mucha tin derecho pa nan opinion wordo scucha.

Ya e weekend tras di lomba tabatin diferente actividad en conexion cu e dia importante aki y e siman aki ta sigui algun mas. Banda cu e ta un dia pa celebra, nos mester cada biaha analisa pa nos mes como pais con nos ta dunando contenido real na e derechonan di nos muchanan.

Un aspecto cu ultimo añanan sigur a bin ta haya hopi atencion ta e parti di abuso di mucha. Algo cu tabata y ta hopi necesario. Pero un cos cu mi a siña for di diferente consulta cu e veld social encuanto e topico aki ta, cu e abuso mas frecuente contra nos muchanan ta keda negligencia. Y esaki no ta algo cu ta den man di gobierno primordialmente. Mas bien ta responsabilidad di e mayornan. Pa ta un mama of un tata no semper ta facil, pero na ningun momento nos mester lubida cu e mucha cu nos a trece na mundo, ta un bendicion di Papa Dios y un responsabilidad grandi. Mas y mas mi ta sigui enfatisa na cada mayor den necesidad, bo no ta bo so. Pidi pa yudansa! Si no ta logra hay’e den seno familiar, semper por acudi na e departamentonan concerni.

Laga nos sigui uza e dia aki pa lanta consciencia y realisa na mesun momento cu ta rekeri di un fundeshi fuerte na cas y tambe di sociedad pa nos por lanta muchanan stabiel, contento y exitoso.