Minister Rocco Tjon: A CELEBRA DIA INTERNACIONAL DI DERECHO DI MUCHA CU “MARCHA PA NOS DERECHONAN”

ORANJESTAD – Diasabra, a celebra dia internacional di derecho di mucha, y manera ta custumber a haci esaki cu e “Marcha pa nos Derechonan”. Nos muchanan tin 42 derecho pues ta importante pa educanan tocante esaki. Como tal, muchanan hunto cu nan mayornan a acudi pa asina trece conscientisacion di e importancia di e tematica aki. Banda di esaki, nos a conta cu e sosten di varios organisacion cu a bin hunto pa brinda informacion na nos comunidad.

Ministerio di Husticia y Asuntonan Social, tin como meta pa salvaguardia e derechonan di nos muchanan. 42 derecho ta hopi, pues e ta importante pa percura pa educa nos muchanan pa nan ta consciente di nan derechonan. A base di esaki a lansa e campaña di conscientisacion “Mi Mesun Heroe”, pa di e forma aki educa nos muchanan riba nan derechonan.

Di otro banda, tambe ta importante pa salvaguardia e derechonan a traves di diferente programa, proyecto y metodonan di trabou manera Codigo di Proteccion, Signs of Safety y mas. Ta importante pa agrega, cu ministerio di husticia y asuntonan social ta trata di atende cu esaki for di diferente angulo, pa cual motibo e ta ensera un maneho multi-sectoral, caminda profesionalnan di sector di enseñansa, sector social, sector hudicial y tambe sector di salubridad publico ta bin hunto pa asina percura pa salvaguardia e derechonan di mucha.

Pues, un momento sumamente bunita caminda por a wak varios di nos profesionalnan cu ta traha den e sectornan aki, a bin hunto, riba nan dia liber, pa duna ful atencion na e topico importante aki. Un danki di curason y un pabien na cada profesional cu a haci e marcha aki posibel y cu ta traha cu hopi amor y dedicacion pa e derecho di nos muchanan.