Parlamentario Hendrik Tevreden ta lamenta cu casonan ta sigui tuma luga: Esfuerso legislativo di Parlamento contra abuso sexual di mucha ta keda un desafio pero tin adelanto na Aruba

ORANJESTAD, Aruba 21 November 2023: Algun caso cu tabatin den Corte di Husticia recientement tabatin di haber cu casonan di abuso. Abuso di mucha cometi door di un tata y un otro caso di abuso sexual contra un hende muhe. Relaciona cu esaki, Lider di Fraccion di MEP, Hendrik Tevreden a expresa su preocupacion, pero na mesun momento a trece informacion hopi relevante relaciona cu e tematica aki dilanti.

Cambio den leynan

El a cuminsa na bisa cu for di 2019 bin ariba, Parlamento y Gobierno a bin ta cambiando un cantidad di leynan, pero na mesun momento, pushando pa atende cu man duro e asunto aki cu ta bibando den comunidad unda cu mayornan ta abusa di muchanan y marca nan pa bida largo.

Tin hopi punto di prevencion cu a wordo crea, departamentonan nobo a wordo lanta, leynan y castigo a wordo aumenta y hopi di instancianan existente a wordo fortifica. Profesionalnan a wordo capacita den diferente departamento, medico Forensico a wordo instala, recherchenan a wordo entrena, pero ta mira cu toch e abusonan ta tuma luga, Tevreden a remarca.

Nos ta mira si cu tin un cambio positivo den e forma cu casonan ta wordo trata dilanti di mesa berde y nos ta contento pero no ta satisfecho. E cambionan cu nos a percura pa nan, ta haci cu awe tin un proceso di interogacion cu ta cana miho, tin un camber adecua pa vang op e muchanan, un medico Forensico cu por busca evidencianan y DNA di cual tur esakinan ta crea un miho dossier pa bringa e caso pa e victima. Esaki ta nifica cu acusadonan tin menos chens di sali liber pa falta di evidencia y ta resultando den castigonan mas halto cu antes Tevreden a subraya.

Apesar di avance casonan ta sigui sosode

Aruba ta avansando riba e tereno aki, pero ta mira cu toch e casonan lamentabel aki ta sigui tuma lugar apesar cu Parlamento, Gobierno, y departamentonan a bin ta haci nan parti. E lider di fraccion di MEP a señala cu Parlamento a atende cu leynan pa locual ta hisa e castigonan, pero tambe a pidi Ministerio Publico pa ahusta su normanan den atende cu e casonan aki. Ministerio Publico a cumpli den adapta esakinan pa asina e acusadonan por wordo husga mas fuerte. Nos ta spera cu den futuro cercano huesnan tambe lo ahusta y revisa nan ‘toemeting’ di castigo y aumenta esakinan. Maske cu tin di bisa cu na Aruba awor castigo pa abuso, ta mas halto cu na Hulanda.

Castigonan a aumenta

Varios cambio a tuma lugar na 2020 en conexion cu proteccion di nos muchanan cu ta wordo abusa. Pa locual ta abuso ‘verkrachting’ mes, e castigo maximo a subi na 15 aña. Pa loke ta trata ‘verleiding’ di menornan di edad esaki a aumenta na 6 aña. ‘Grooming’ cu ta algo cu ta andando aworaki den escala hopi grandi den nos comunidad tambe a wordo cambia pa 3 aña. Naturalmente casonan mas pisa unda cu tambe tin ‘zware mishandeling’ esaki a subi na maximo di 24 aña di castigo. Tin un lista grandi di castigonan cu a aumenta, e Parlamentario a remarca. No ta solamente castigonan a wordo aumenta pero tambe programanan di prevencion a wordo aumenta. Programanan manera ‘Mi Mes Un Heroe’ pa conscientisa muchanan desde un edad hoben caba con pa tin un voz y con pa reconoce e diferente tipo di abusonan manera negligencia, abuso sexual, abuso emocional y abuso verbal y fisico. Parlamento ta orguyoso di por tawata parti di a percura pa esakinan.

“Nos ta spera cu den futuro, e sistema lo por conoce mas cambionan”. Kisas por imita Merca, unda cu pa cada acto ta haya un castigo separa cual despues ta wordo suma na un cantidad total. Maske cu esey ta dificil pero ta algo pa pensa riba dje.  

E cambionan haci na 2019 y 2020 ta dunando resultado, e continuacion di entrenamento y fortificacion di departamentonan cu ta andando ainda lo bai yuda aun mas, pero asina mes ta keda lamentabel pa scucha cu parehanan ta keda maltrata y abusa. Y muchanan ta wordo abusa door di nan mes mayornan, esnan cu tin cu cuida nan asina Hendrik Tevreden a conclui.