Prome Minister ta felicita y gradici tur esnan cu a aporta na e logro grandi aki

LEY PLAN DI MAYOR A WORDO APROBA DEN PARLAMENTO DI ARUBA

Diamars 21 di November, a tuma luga den Parlamento di Aruba e reunion publico pa trata e Ley di Plan di Mayor. E ley a wordo aproba. Plan di Mayor ta un ley sumamente importante na bienestar general di nos muchanan cu ta stipula cu ora un pareha separa, nan mester yega na un plan con tur dos lo sigui ta parti di e bida di e muchanan. Esaki sigur ta algo hopi positivo pa nos comunidad pasobra despues di decision pa separacion, mayornan a base di e ley aki por dicidi hunto con pa sigui padilanti poniendo nan yiunan centraal.

“Un PABIEN y DANKI na e comision di Plan di Mayor, cu a wordo institui na 2019, pa nan aporte incondicional pa cu esaki a bira un realidad, bou guia incansable di Michella Steenvoorde Laclé. Un PABIEN y DANKI tambe na colega Minister Rocco Tjon pa su vision y perseverancia. Plan di Mayor ta un tremendo proyecto pa Aruba!,” Prome Minister Evelyn Wever-Croes a expresa.

E COMISION PLAN DI MAYOR TA CONSISTI DI:

1. Michella Steenvoorde- Lacle (Ministerio di Husticia y Asuntonan Social)

2. Bert Wielenga (Centro ortopedagogico)

3. Aisca Berkmeyer (Directie Voogdijraad)

4. Sacha Geerman (Directie Sociale Zaken)

5. Magaly Maduro (Bureau Sostenemi)

6. Sylvie Eman (Corte di Aruba)

7. Luc Alofs (Universidad di Aruba)

8. Desiree Helder (Centraal Bureau Statistiek)

9. Yvonne Bermudes (Centro di hoben y famia)