Minister Rocco Tjon: CEDE ARUBA DEN CUADRO DI PROYECTO VEILIGE BARIO’S TA BAY LANSA SU WEBSITE DI MAS NOBO “BARIO UNICO”

ORANJESTAD – Diamars anochi, Minister di Husticia y Asuntonan Social sr. Rocco Tjon, tawata presente na e “community building event” organisa pa CEDE Aruba, den cuadro di e proyecto di “Bario Unico” cual ta cay bou di e capa di “veilige bario’s”. Un momento importante, caminda tur e centronan di bario a bin hunto, pero tambe 40 organisacion a wordo invita, pa presencia e evento aki, pa asina wak con nan por colabora mas cu e centronan di bario, pa di e forma ey brinda mas actividad pa cada ciudadano cu ta biba den e diferente barionan.

Ta asina cu na 2021, den e plan di maneho di Ministerio di Husticia y Asuntonan Social a incorpora e proyecto di Veilige Bario’s, cual ta consisti di tres pilar. E prome pilar ta pa crea mas responsabilidad y fortifica e sentido di responsabilidad y participacion di cada ciudadano den nan bario. E di dos pilar ta pa inverti den crea barionan mucho mas sigur pa loke ta trata trafico y iluminacion. E di tres pilar ta percura pa mas inversion den e centronan di bario mes.

Na 2023 a formalisa e colaboracion cu CEDE Aruba pa loke ta trata e parti di inversion den e centronan di bario, kende hunto cu Minister Ursell Arends y Minister Endy Croes a percura pa mas fondo por wordo aloca, pa asina e centronan di bario por organisa hopi mas actividad. CEDE Aruba ta un partner hopi responsabel y confiabel den e proyecto aki, mirando cu nan ta brinda e asistencia na e centronan di bario y ta maneha e fondonan, pa di e forma aki, e centronan di bario por organisa nan actividadnan y haci uzo di e fondonan aki, na un manera mas practico.

For di juni y juli, alrededor di nuebe lider di programa a wordo emplea pa por asisti tur e diferente centro di bario, y ya caba por presencia e efecto di esaki, caminda mas y mas actividad ta wordo organisa den e centronan di bario. Pues, cu hopi satisfaccion ta bay lansa e website di Bario Unico dentro di dos siman, pa asina cada ciudadano cu ta biba den e diferente barionan, por ta al tanto di e actividadnan cu ta wordo brinda den nan centro di bario y di e forma ey participa na esaki.

Por ultimo, e mandatario a expresa cu colaboracion y traha hunto ta hopi importante, y mescos cu esaki a wordo haci den forma di un proyecto multi-ministerial y mescos a colabora cu CEDE Aruba y e centronan di bario, cual ta un compromiso a largo plaso, caminda den e siguiente cinco añanan nos dilanti, lo aloca fondonan adicional. Ta spera cu e anochi aki a yuda pa e 40 organisacionnan aki por a conecta cu e centronan di bario y asina traha mas di cerca cu otro y asisti e centronan di bario pa brinda mucho mas actividad na nos comunidad.