Minister Maduro tabata presente na e “A-Maze Experience” en conexion cu e celebracion di 65 aña di Cas di Cultura

Diabierna cu a pasa, den un evento cu a keda marca pa musica, alegria y celebracion, Minister di Cultura, Xiomara Maduro, tabata presente na e celebracion di e 65 aña di historia y legado cultural di e icono cu ta Cas di Cultura. E evento yama “A-Maze Experience – 65 Aña di Emocion”, tabata un fusion unico di arte, teatro, historia y entretenimento, diseña pa celebra hunto cu socionan principal y amigonan di e plataforma aki.

Cas di Cultura, cu ta un centro di cultura y arte den nos comunidad desde cu e la wordo funda, a organisa un experiencia unico cu a hiba esnan presente den un viahe bek pa pasado. E “A-Maze Experience” tabata consisti di diferente presentacion artistico y exhibicion interactivo cu a destaca e logronan cultural di Cas di Cultura a lo largo di e ultimo 65 aña.

Minister Maduro, na final di e anochi aki a enfatisa e importancia di Cas di Cultura como un espacio pa preservacion y promocion di e identidad cultural di nos Pais. ‘E “A-Maze Experience” no tabata solamente un celebracion di pasado, pero un inspiracion pa futuro di nos cultura y arte.’

Minister Maduro ta gradici Cas di Cultura y henter e ekipo pa nan papel importante den fomentacion di talento local y crecemento di bida cultural di nos isla. E experiencia a termina cu un exhibicion special cu a laga esnan presente cu un aprecio profundo di e herencia cultural rico di nos Pais. E aniversario aki no ta marca solamente un momento di celebracion, pero tambe un punto di reflexion riba futuro y evolucion continuo di Cas di Cultura, sigurando cu e sigui ta un pilar fundamental den e comunidad cultural di Aruba den e añanan cu ta bin.