Minister Xiomara Maduro di Cultura ta felicita tur musico riba Dia di Santa Cecilia

E Dia di Santa Cecilia ta conoci como dia di Musico y ta ser observa mundialmente, reconociendo Santa Cecilia, e santa patrona di musiconan. E dia aki ta sirbi como un recordatorio di e poder y bunitesa di musica y e individuonan talentoso cu ta dedica nan bida na e arte aki.

Minister di Cultura, Xiomara Maduro, ta extende un cordial saludo y gratitud profundo na tur musico pa nan contribucion invaluabel na nos comunidad. Celebra anualmente, e dia aki ta marca un momento significativo pa reconoce e idioma universal di musica y esnan cu ta crea e arte aki.

‘Awe (22 di november), mientras nos ta celebra Dia di Santa Cecilia, nos ta reconoce no solamente e melodianan y ritmonan cu ta yena nos bida cu alegria y emocion, pero tambe e individuonan dedica tras di e forma di arte aki,’ Minister Maduro a bisa en conexion cu e dia aki. ‘Musica ta transcende fronteranan cultural, linguistico y geografico, uniendo nos den un experiencia comparti di humanidad. 

E mandatario a pone enfasis riba e importancia di musica den formacion di identidad cultural y di nos herencia. ‘Nos musiconan no ta solamente ‘entertainers’, nan ta representa nos herencia cultural, contado di cuentonan di nos histora y embahadornan di nos tradicion diverso’.

Minister Maduro ta reconoce tambe cu hasta den momentonan dificil, nos musiconan ta sigui ta un fuente di inspiracion y ta lanta nos animo, probando cu musica tin un forsa resiliente cu ta florece hasta den adversidad. E mensahe di e mandatario ta bay mas leu cu aprecio, enfatisando e compromiso di Gobierno di Aruba pa apoya e arte aki. ‘Como Minister di Cultura, ta mi deber y honor pa sigura cu tur musico ta ricibi e sosten y reconocemento cu nan merece. Nos ta comprometi pa cultiva un ambiente unda arte por florece y unda nos musiconan por sigui deleita nos cu nan talento.’

Minister Maduro ta yama comunidad pa uni na e celebracion di nos musiconan. ‘Laga nos tuma un momento awe (22 di november) pa mustra aprecio na e musiconan den nos bida, paso nan ta esnan cu ta enrikece nos alma cu e idioma universal di musica. Na tur nos musiconan, danki pa boso melodianan, boso pasion y boso dedicacion. Feliz Dia di Santa Cecilia.