Minister di Finansa ta informa: Cuenta Anual di Pais Aruba di aña 2019 a wordo entrega na Controlaria General

Pa fin di aña 2024 ta spera di por recupera e retraso den compilacion di cuentanan anual di Pais Aruba

Diahuebs ultimo Minister Maduro di Finansa hunto cu Director di Departamento di Finansa, sr. Werleman, tabata na Controlaria General di Aruba conoci como Algemene Rekenkamer Aruba (ARA), pa haci entrega di e Cuenta Anual di Pais Aruba di aña 2019 na Presidente di e Colegio di Controlaria General di Aruba, sra. Croes-Williams. E entrega a tuma luga den presencia di Secretario di ARA sra. Curret y miembro di Colegio di ARA, sr. Samson.

Retraso debi na varios factor

Minister Maduro a splica esnan presente cu e Cuenta Anual 2019 ta wordo entrega cu retraso debi na varios factor. E cifranan di aña 2019 lo sirbi como base pa por yega na un declaracion di accountant pa e Cuenta Anual di aña 2026. Pa esaki trabounan di ‘nulmeting’ y tambe di ‘balanssanering’ mester a tuma luga den aña 2018 y 2019 prome cu por a bay over na compila e Cuenta Anual pa Aña 2019. Banda di esaki e ‘lockdown’ den pandemia a trece retraso den e trabounan den aña 2020 y 2021. Mester menciona cu e impasse riba e aprobacion di e Cuentanan Anual di aña 2016 y aña 2017 pa Parlamento di Aruba, tambe a trece retraso grandi den e trabounan pa por a finalisa e Cuenta Anual di aña 2019. Por ultimo, e aplicacion riba cual e administracion financiero di Pais Aruba ta draai, GFS/EnterpriseOne, tambe mester a haya su ‘upgrade’ na comienso di aña 2023 y esaki a trece cune un retraso di algun luna.

Pa fin di aña 2024 ta spera pa recupera e retraso

E mandatario encarga cu Finansa a sigui splica cu pa fin di aña 2024 ta spera di por recupera e retraso den compilacion di cuentanan anual di Pais Aruba, segun e siguiente schedule. Cuenta Anual di Aña 2020 ta premira pa wordo entrega na ARA na februari 2024. Cuenta Anual di Aña 2021 ta premira pa yega na ARA na juni 2024. Cuenta Anual di aña 2022 ta premira pa september 2024 y Cuenta Anual di aña 2023 lo por wordo entrega na ARA na December 2024. Di e manera aki Minister Maduro ta spera di por cera e ciclo presupuestario di e añanan corespondiente.

Ta gradici ARA pa nan pasenshi y bon cooperacion

Minister Maduro a haci uzo di e oportunidad pa asina gradici ARA pa nan pasenshi pa por a warda pa e trabounan pa compila Cuenta Anual 2019 por a keda cla. E mandatario ta gradici e team di Departamento di Finansa y tur otro persona y instancia cu a coopera pa asina Cuenta Anual 2019 por a keda termina. Minister Maduro ta desea e team di ARA hopi exito pa e trabounan cu awo lo sigui pa constata cu si e fondonan cu Parlamento a aproba pa Gobierno traha cune, a wordo uza na un manera legal y pa e meta pa cual a duna aprobacion.