Cu hopi entusiasmo Grant Thornton Aruba ta lansa academia nobo

Grant Thornton Aruba a lansa durante un rueda di prensa riba 2 di maart nan academia nobo: ‘Learning & Development Academy by Grant Thornton Aruba’. E academia lo ofrece diferente curso y training den e tereno di finansa, impuesto, maneho di recurso humano y tambe liderazgo. E training nan ta pa tur persona cu kier inverti den nan desaroyo personal y profesional. Cu e academia aki Grant Thornton Aruba kier contribui na enrikese e conocemento y desaroyo di comunidad di Aruba.
Segun Edsel Lopez, Managing Partner na Grant Thornton Aruba e ta un soño cu awo a bira realidad. Grant Thornton Aruba a inverti den e academia nobo aki y a crea un ‘state of the art’ classroom na unda cu expertonan den e ramo di finansa, impuesto, maneho di recurso humano y liderazgo, lo intercambia ideanan y pensamento cu e participantenan den un forma interactivo y personal. “Durante e pandemia di Covid-19 nos a duna webinars, pero awo ta e momento crucial pa nos cuminsa bai bek na normal y traha hunto pa enrikese e conocemento di nos hendenan pa por juda Aruba su economia”, ela bisa durante e rueda di prensa.
Academy Manager Sheba Sookoo cu ta encarga cu e programa di e academia, ta un Senior Manager na Grant Thornton Aruba. E ta conta cu e ta sumamente contento di por comparti su experticio y conocemento cu e comunidad di Aruba. “Duna training y comparti conocemento ta mi pasion, mi ta orguyoso cu nos por presenta nos Learning & Development Academy awe.”
E academia lo cuminsa cu diferente training den e lunanan proximo. Lance Henriquez, Tax Manager na Grant Thornton Aruba, lo duna, hunto cu su coleganan di e Tax team di Grant Thornton Aruba, den luna di maart training tocante e Reforma Fiscal cu lo bai na vigor na 2023. Durante e training cu lo tuma lugar dia 15,16 y 17 di maart, lo enfoca riba ki cambionan lo tuma lugar y kico e consecuencia esaki lo tin pa companianan pero tambe kico lo cambia pa abo como individuo. “BTW ta entre otro un di e topico cu awo ta hopi interesante y actual, hopi hende lo kier atende y keda informa, pesey e expertonan den Tax di Grant Thornton Aruba lo duna posibilidad pa participa na e training riba e diferente dianan”, Lance ta sigui splica.
Shelby Maduro, Senior Manager na Grant Thornton Aruba lo duna diferente training tocante e tema di ‘people management’, na undo lo enfoca ariba loke ta wordo jama ‘soft skills’. Den luna di April e lo duna un training tocante con pa papia cu bo trahadornan ariba nan performance, algo cu no tur hende ta haya facil pa haci, e ta splica. Durante e training “How to talk about performance with your employees”, cu lo wordo duna riba dianan 19 y 20 di april, lo enfoca entre otro ariba e abilidad pa duna feedback constructivo. Akinan tambe participantenan por scohe entre diferente dia pa sigui e training.
Den luna di mei Sheba Sookoo lo duna un training cu ta introduci partcipantenan na e mundo di ‘financial statements’. E training ta pa tur personanan cu kier compronde e ins and outs mas miho di nan financial statements, cuenta annual. Participantenan por scohe pa registra pa e training riba 3 of 4 di mei.
Pa mas informacion tocante e diferente training cu lo wordo ofreci, registracion y costo pa cada training por bishita e website www.grantthornton.aw na unda tin mas informacion di e Learning & Development Academy by Grant Thornton Aruba.