MINISTERIO DI TURISMO TA FELICITA TUR PERSONA CU A SOBRESALI Y GANA E “AHATA EXCELLENCE AWARDS 2023″
ORANJESTAD –Minister di Turismo y Salud Publico Sr. Dangui Oduber tabata presente na AHATA su anual “Excellence Awards 2023”. E bunita ceremonia a tuma lugar diasabra den e ballroom di Renaissance Convention Center.
Den e ceremonia aki a honra tur e personanan cu a sobresali den servicio di e sector di turismo. E premionan anual di AHATA ta di sumo importancia pa asina reconoce tur cuta labora y aporta pa duna servicio di calidad na nos bishitenan. AHATA a honra 43 nominado y mester bisa cu tur tabata un ganador aribanan mes, mirando cu e escogencia ta di mas cu 10,000 empleado den e sector aki.
Minister Dangui Oduber ta manda palabranan di felicitacion y aprecio na tur e nominadonan/ganadornan. Cada un di boso a demostra dedicacion remarcabel y a supera expectivanan den brinda servicio den e industria di turismo. Aruba ta keda conoci pa su hospitalidad y nos compromiso di ta e “One Happy Island”.
Ademas, proyectonan manera; Gateway 2030, Beautification di Eagle Beach, Masterplan di Seroe Colorado, Boardwalk di Malmok y Arte di Mosaic na e trapi di Hooiberg ta algun ehempel di nos compromiso pa sigui mehora e producto di Aruba. E iniciativa di e “AHATA Excellence Awards” ta pa mehora e experiencia di bishitante, preserva nos bunita naturalesa, celebra nos cultura y herencia y sigui innova pa un turismo sostenibel y unico na Aruba.
Finalmente, Minister Dangui Oduber ta gradici AHATA pa nan sosten, colaboracion y compromiso pa sigui mehora nos industria di turismo y sigui crea experiencia inolvidabel pa nos bishitante di Aruba.
