Minister Maduro na ocasion di entrega di Cuenta Anual 2019 na ARA: E presentacion di Cuenta Anual 2019 a conoce cambionan
Ta prepara pa por haya un declaracion di accountant riba Cuenta Anual 2026
Recientemente Minister Maduro di Finansa a haci entrega di e Cuenta Anual di Pais Aruba pa aña 2019, na Algemene Rekenkamer Aruba (ARA). E mandatario a splica cu e Cuenta Anual 2019 ta contene cambionan importante pa asina por forma e fundeshi necesario pa por haya un declaracion di accountant riba e Cuenta Anual di Aña 2026.
Na e ocasion aki Director di Departamento di Finansa, sr. Derrick Werleman, a brinda un splicacion di e cambionan mas importante. Entre nan, Cuenta Anual 2019 ta contene e resultado di e ‘nulmeting’ haci pa Centrale Accountantsdienst CAD y tambe ta contene e cambionan den balans a causa di e ‘balansverschoning’ cu a tuma luga den aña 2019. E balans ta conoce un otro particion y presentacion ya cu por ehempel ta saca afo e ‘verjaarde vorderingen.’
E cambionan aki a causa retraso den e trabounan pa finalisa Cuenta Anual 2019, pero nan ta necesario. Ta cambionan cu ta brinda e base cu lo yuda pa e cuentanan anual di Pais Aruba den un futuro cercano por bay conta cu un ‘accountantsverklaring’ cu ta certifica cu e cifranan presenta ta real y wordo compila ta conforme e standardnan internacional di raportahe.
Pa awo tur esfuerso ta dirigi pa asina e Cuenta Anual di aña 2026, conforme palabracion den e Protocol di aña 2018 entre Aruba y Hulanda, por ricibi un declaracion di Stichting Overheidsaccountantbureau SOAB cu por certifica cu e cifranan den e Cuenta Anual 2026 ta corecto y ta duna un bon bista di locual a pasa den e aña eynan.
