Minister Rocco Tjon: A FIRMA CONTRACT CU CONTRATISTA PA LOKE TA E RENOBACION DI EX WARDA DI POLIS SAVANETA
ORANJESTAD – Diamars mainta, durante conferencia di prensa di Gobierno di Aruba, Minister di Husticia y Asuntonan Social sr. Rocco Tjon a firma contract cu representante di e compania ALBO como tambe Monumenten Bureau pa loke ta e renobacion di e edificio di ex warda di Polis Savaneta, cual ta un monumento.
Manera ta concoci, den e plan di maneho di Ministerio di Husticia y Asuntonan Social, e ta importante pa inverti y crea condicionnan pa asina e personal por haci nan trabou na un manera eficiente y sano. Inversionnan pa loke ta trata infrastructura ta hopi importante y asina a bin ta inverti caba den diferente proyecto infrastructural pa e parti di husticia.
Asina por menciona cu a renoba Brandweer post siera y pa otro aña a haya aprobacion pa renoba post oscar, cual ta e post situa na aeropuerto. Banda di esaki, warda di Polis di playa a muda pa un edificio completamente nobo na Paardenbaaistraat, y e warda na San Nicolas a wordo renoba por completo. Pues, awo a toca e turno na e edificio di e ex warda di polis na Savaneta, cual pa hopi aña tawata un edificio bandona, y awo ta bay wordo renoba por completo.
Ta trata di un inversion grandi di alrededor di un miyon florin, caminda e trabounan lo inicia na januari 2024, y lo termina despues di 160 dia pa asina conta cu un edificio completamente renoba. A base di palabracionnan cu Korpschef, e edificio aki ta bay wordo uza door di Cuerpo Policial, caminda diferente ekipo di Cuerpo Policial ta bay wordo ubica akinan.
Cu e proyecto aki acerca, Savaneta lo bay conta cu dos edificio pa e cadena hudicial; dos diferente ekipo di Cuerpo Policial lo bay wordo ubica na Savaneta. Manera ta conoci e otro ekipo cu lo bay wordo ubica na Savaneta, ta e ekipo di e Operation Command Center, cual na e momentonan aki ta bou di renobacion y lo keda cla na April 2024. E ekipo aki ta bay percura pa vigila e imagennan di e diferente proyectonan di camaranan di siguridad.
Por ultimo, minister Tjon a expresa di ta agradecido na Monumenten Bureau, cu a percura pa henter e proceso di destaho cana debidamente, pa cual e escogencia a cay riba e compania ALBO. Tambe, ta hopi satisfecho cu ALBO a bay di acuerdo pa asumi e responsabilidad pa ehecuta e proyecto aki pa pais Aruba.
