Parlamentario Ricky Hoek: Lamentablemente awendia hopi hende muhe ta den situacionnan di violencia, lo cual ta exigi un accion inmediato

ORANJESTAD, Aruba, 27 di november 2023: Siman pasa diasabra, gobierno di Aruba a ilumina e edificio di Bestuurskantoor na color oranje como un muestra di solidaridad den e lucha contra violencia contra hende muhe.

Den nomber di Gobierno di Aruba, Minister Rocco Tjon a dirigi palabra, hunto representantenan di organisacionnan manera Centro Desaroyo di Hende Muhe (CEDEHM), Fundacion Contra Violencia Relacional (FCVR), United Nations High Commissioner for Refugees (UNHCR), HIAS y SOROPTIMIST.

Na final, e organisacionnan a presenta un manifiesto na Minister Rocco Tjon y Parlamentario Darlaine Guedez Erasmus. Parlamentario Ricky Hoek, di Fraccion di MEP, a expresa durante un conferencia di prensa cu esaki ta keda den liña cu e 16 dianan di activismo contra violencia di hende muhe. “Nos sa cu te dia di awe hopi hende muhe ta biba den situacionnan di violencia y nos mester para esaki. No ta nada bon pa nos hende muhenan sufri y biba den incertidumbre, den temor, pa nan wordo maltrata fisicamente, verbalmente, mentalmente door di nan pareha,” el a splica.

El a pidi tur hende y pueblo di Aruba pa para keto y tur dia, tiki tiki duna sosten na e accion aki contra violencia riba muhe. Si bo conoce un persona, un muhe cu mester di asistencia, por referi e dama aki na e organisacionnan menciona. Si bo conoce un homber cu posiblemente ta e persona cu ta causa e violencia contra di un dama, tambe por referi e persona aki na un di e instancianan concerni, Hoek a indica.

Algun siman pasa, Fundacion Hende Homber tambe tabata tin nan conferencia caminda nan a duna di conoce cu nan ta atende cu e personanan aki. Ademas di esey, tin departamento di gobierno cu por duna un man den casonan di personanan cu mester di yudansa emocional of psicologico. “Asin’aki, nos ta yama henter pueblo di Aruba pa uni den e 16 dianan di accion contra violencia riba hende muhe y asina duna nos damanan di Aruba un futuro mas sigur,” Parlamentario Ricky Hoek a conclui.

“Hunto nos por caba cu violencia contra hende muhe”, el a agrega.