Parlamentario Hendrik Tevreden (MEP): Reunion den Parlamento cu Minister Tjon relaciona cu caso lamentabel cu a sosode den warda di polis

ORANJESTAD, Aruba 28 November 2023: Un topico cu Lider di Fraccion di MEP, Hendrik Tevreden a trece dilanti den rueda di prensa e topico relaciona cu e reunion publico den Parlamento dialuna riba e sucesonan lamentabel di suicidio cu a sosode ultimo den warda di polis. Hendenan a comete suicidio y sigur cada caso ta uno di lamenta.

Minister di Husticia y Asuntonan Social Rocco Tjon a duna un splicacion riba e sucedidonan aki ampliamente caba cu enfasis riba e ultimo caso. Fraccion di MEP a haci un peticion na e mandatario pa atende e reunion cu tur stakeholder den e cadena hudicial y social pa asina por duna un splicacion amplio riba e topico. Esaki ta importante pasobra kier evita cu mal informacion por sigi plama bay pafo. Pesey ta importante pa tur profesional presente duna contestanan al caso riba e responsabilidad di e cadena hudicial como tambe e forma di coopera cu otro pa casonan cu por pasa den prizon, a remarca.

“Mi ta kere cu e topico aki ta hopi sensativo y el a ocasiona un impacto den nos comunidad y cu famianan a keda cu hopi dolor” , a bisa. Nos ta spera cu famianan haya tur cooperacion y atencion di instancianan pa asina nan por surpasa e momentonan dificil aki, lider di Fraccion di MEP a finalisa bisando.