Minister Endy Croes: TUR STUDIANTE, MAYOR Y DOCENTE TA CORDIALMENTE INVITA

PA ATENDE HIGHER EDUCATION IN NORTH AMERICA (HENA) EXPO DIABIERNA, PROME DI DECEMBER NA HYATT PLACE ARUBA AIRPORT

ORANJESTAD: Minister di Enseñansa y Deporte Endy Croes hunto cu Sra. Jo-Anne Croes di Universidad di Aruba ta extende un invitacion na tur studiante, mayor y docente pa 2023 Higher Education North America (HENA) Expo cu lo tuma luga na Hyatt Place Aruba Airport, dia 1 di december di 9 am pa 5 pm.

E meta principal di HENA Expo ta pa crea un plataforma pa e studiantenan cu kier explora e opcion di studia na Merca of Canada. Durante e exposicion lo tin un total di ocho instituto di enseñansa superior Mericano y Canades presente pa brinda informacion na nos studiante- y mayornan, entre otro, University of South Carolina, Coastal Carolina University, Valencia College, Saint Mary’s University, Bishop’s University, Embry-Riddle Aeronautical University, Colorado State University y Niagara College. Banda di esaki, diferente partner di Aruba cu ta sostene e studiantenan durante e proceso aki lo ta presente pa brinda informacion y contesta pregunta di e studiante- y mayornan.

Tin varios acuerdo firma cu diferente instituto na Merca y Canada cu ta haci e aspecto financiero uno mas factibel. Cu e acuerdonan cu a logra firma, a crea espacio pa e studiantenan di Aruba haya un “in-state tuition”, en bes di “tuition” internacional. Esaki ta nifica cu en bes di paga rond di 30 pa 40 mil dollar, e studiantenan di Aruba por paga awo solamente rond di 16 pa 18 mil dollar. Esaki ta un oportunidad grandi pa e studiantenan di Aruba cu ta desea di continua nan estudio na Merca of Canada. 

Pa finalisa, Minister Endy Croes ta gradici EducationUSA y Sra. Jo-Anne Croes cu ta e motor tras di e proyecto aki. Alabes, ta invita tur studiante y docente di Colegio EPI, Colegio Arubano, Colegio Nigel Matthew, Mon Plaisir College, EduCampus, De Schakel College, International School of Aruba y YNZ Montessori High School pa bishita e exposicion diabierna proximo, entre 9 am pa 5 pm.