Ricky Hoek, Parlamentario Fraccion di MEP: Mike Eman tin Fondo Number 6 den bista pa bolbe hinca Aruba den un situacion financiero desastroso

ORANJESTAD, Aruba 30 November 2023: Den pasado, e Gabinetenan di AVP a bin cu diferente tipo di fondo. Un biaha mas ta scucha cu Sr. Mike Eman kier bin cu e Sociaal Cultureel Plan Bureau caminda e kier hinc’e den algo parecido na un fondo.

Parlamentario di Fraccion di MEP, Ricky Hoek a indica cu bayendo bek den decadanan atras, por mira cu Partido AVP a crea Fondo di Desaroyo Nobo San Nicolas, Fondo Plan di Bario, Fondo di Garantianan Hotelero, Fondonan di debe di PPP y Fondo BoAruba.

“Aworaki Sr. Eman tin e fondo number 6 den bista, e Fondo di Sociaal Cultureel Plan Bureau. Pakico? Na momento cu Sr. Mike Eman a tende cu Gobierno di Aruba tin un surplus y cu gobierno di Aruba mester bay paga mas na Hulanda, el a haya e briyante idea pa core sali bay Hulanda pa haci un pantomina na Hulanda caminda cu e kier crea un fondo nobo”, Hoek a indica.

Eman kier crea un Sociaal Cultureel Plan Bureau cu ta un organo cu mester ta independiente, cu ta bay exigi bastante fondo y expertonan pa traha riba investigacionnan cu ta encera e area social, cultural y tambe economico di Aruba, segun e Parlamentario. Na Hulanda mes, Minister di Estado sr. Donner , cu ta un hurista hulandes cu un trayectoria distingui y reconoci den Reino Hulandes a bisa Eman cu e fondo aki lo ta irealistico pa Aruba pasobra ta un fondo cu mester ta independiente y lo costa Aruba miyones mirando e caracteristicanan cu e organo aki mester tin, a remarca. Ademas di esey, 

Parlamentario Hoek a finalisa bisando cu na Aruba mes, Sr. Eman no ta tene cuenta ni cu Oficina di Estadistica (CBS), Raad van Advies of Algemene Rekenkamer, aworaki e kier implementa e fondo number 6 di AVP, esta Sociaal Cultureel Plan Bureau pa asina hinca Aruba den un situacion economico financiero desastroso, for di cual tin cu keda leu.