Entrevista di Siman cu Parlamentario Ricky Hoek: Dos aña den Parlamento, un caminda di compromiso cu e comunidad di Aruba

“Mi ta spera di por sigui enfoca mas riba e leynan cu ta hopi importante pa nos comunidad”

ORANJESTAD, Aruba 30 november 2023: Dia 1 di December ta un dia hopi special pa Parlamentario Ricky Hoek. E dia aki e ta haci 2 aña como Parlamentario.

“Mi vision ora cu mi a drenta den politica y Parlamento di Aruba tabata pa drenta semper pa e bienestar di nos comunidad. Principalmente mi enfoke ta riba muchanan, riba hobennan y tambe riba e personanan cu limitacion”, el a expresa. E areanan social, di educacion y tambe di labor ta e tres areanan cu e mas ta enfoca. 

Con Ricky ta mira e dos añanan cu a transcuri?

Durante e dos añanan aki e ta bisa: “Ora cu bo ta trata cu leynan y presupuesto di pais Aruba bo tin cu adapta bo mes y bo tin cu traha riba tur e terenonan cu ta bin dilanti”. Tin terenonan cu no ta e ‘background’ di e Parlamentario, pero cu nan ta siña y ta haya e conocemento di loke ta trata e temanan aki, a bisa.

Con Ricky ta describi e trabao di un Parlamentario?

“E ta un trabao humilde, sublime y hopi importante pasobra ta den bo man abo como representante di pueblo pa scucha kico e hendenan kier. Loke ta nan preocupacionnan y a base di esaki bo ta traha cu bo gobierno pa wak si nan maneho ta realisa e deseo di pueblo”, a indica.

Hoek ta remarca cu ta hopi importante pa como Parlamentario controla e trabao di e ministernan, di gobierno, tambe e parti huridico. Por ehempel, aunke algun aña pasa a aproba e ley di ‘leerplicht’, e ta repasando e ley aki atrobe pasobra tin cierto mehoracionnan cu mester haci den e parti di boet of otro forma pa sanciona e mayornan.

Con Parlamentario Hoek ta wak e 2 añanan cu falta ainda?

“Pa loke ta e futuro di mi trabao, ainda tin dos aña pa bay den politica y mi ta spera di por sigui enfoca mas riba e leynan cu ta hopi importante pa nos comunidad. Manera e ley di leerplicht cu mi ta bezig cu ne na beneficio di tanto e mayornan como di e muchanan y di e sistema di educacion den su totalidad”.

Tin mas leynan riba cua mester traha den e periodo aki?

Parlamentario Hoek su deseo ta pa bin c’un ley cu ta dirigi na e hobennan. Na Hulanda nan a haci’e un ‘Jeugdwet’. Un otro parti cu tambe a hala su atencion ta e parti di labor mirando cu e forsa laboral ta esun cu ta carga e economia di e pais. E ta na su lugar pa duna un poco mas atencion riba e area ey pasobra tin cierto cambionan cu lo mester tuma lugar. Por ehempel, riba e trabaonan ‘part-time’.

Hoek tambe a menciona e aspecto di cantidad di ora di trabao pa siman. Por ehempel, si lo mester bay cambia e cantidad di 40 ora pa siman, si tin cu baha esey y con ta bay haci cu e personanan cu ta trahando kisas 48 ora of mas ora. Ta trata di leynan laboral cu tin un impacto tambe riba e sociedad pero tambe riba e nucleo familiar. “E circulo di e leynan laboral, e leynan social y di desaroyo en general ta hopi importante pa combina nan hunto pa asina wak kico ta e puntonan cardinal cu mester atende cu nan pa asina bay promove y stimula bienestar general di e comunidad di Aruba”. 

Ricky Hoek a gradici tur persona cu a pone e confiansa den su persona y pa tur e votonan cu el a haya. Na tur persona cu den cualkier forma por tabata tin contacto of cu a traha cu nan den diferente tereno na Aruba. Na tur ciudadano cu e a topa na un actividad of na supermercado y ora di combersa nan a duna sugerencia y te hasta zundra. 

“Pero esey ta e trabao di un politico. Un trabao sublime, un trabao humilde, hopi bunita, hopi importante y mi ta agradecido pa e oportunidad cu m’a haya”, asina e Parlamentario a finalisa bisando.