Parlamentario Hoek (MEP): Dia Internacional di Persona cu Discapacidad
Na Aruba tin un total di 5.591 persona cu un of mas discapacidad
ORANJESTAD. Aruba 2 December 2023: Desde aña 1992 Nacionnan Uni a proclama e dia 3 di december como e “Dia Internacional di Persona cu Discapacidad”. Tur aña riba e fecha aki, humanidad rond di mundo ta conmemora e dia importante aki.
E meta di e “Dia Internacional di Persona cu Discapacidad” ta pa promove comprendemento di problemanan di discapacidad y pa mobilisa sosten pa e dignidad, derechonan y bienestar di e persona cu discapacidad. Ademas e dia kier concientisa sociedad di e beneficionan di integracion di e persona cu discapacidad den tur aspecto di politica, social, economico y cultural.
Discapacita of Handicap?
Awendia rondo ta usa e terminologia ‘discapacita’ enbes di ‘handicap’. Esaki ta pa tene cuenta y duna respet na e persona cu tin un of otro, y tin bes multiple limitacion. E Tratado riba e Derechonan di Persona cu Discapacidad ora ta defini e casonan y derechonan di persona cu discapacidad no ta basa su mes riba un ‘modelo medico’, sino mas bien un ‘modelo social’.
Ora ta papia di un persona cu discapacidad, ta referi na “un persona cu tin un discapacidad fisico, mental, intelectual of sensorial pa un termino largo di cual den interaccion cu varios barera por obstaculisa e persona su participacion complete y efectivo den sociedad a base di condicionnan igual cu lo demas”.
Cifranan na Aruba
For di e ultimo Censo di CBS na 2020, por saca afo cu na Aruba tin un total di 5.591 persona cu un of mas discapacidad. E cifra aki ta refleha un 5.2% di e populacion. Sinembargo, CBS ta di opinion cu e cifra lo ta mas halto. Esaki debi cu na 2020 tabata tin e pandemia di covid-19 y esaki lo tabata tin su efectonan riba e respondientenan cu a of no a participa na Censo 2020. Motibo un ta, cu debi cu e Censo a wordo realisa na manera “online”/digital, tin pregunta tocante persona cu discapacidad por a wordo sin keda yena. Di dos motibo ta, personanan cu un discpacidad for di nan perspectiva lo a considera nan caso menos grave compara cu personanan cu tin covid-19.
E tiponan di discapacidad cu a resalta for di e censo ta entre otro: dificultad cu cuido-propio, dificultad cu comunicacion, dificultad cu oido, dificultad cu memoria, dificultad cu canamento, dificultad cu bista. Di cual e dificultad cu canamento a resulta di ta esun mas hopi, sigui pa dificultad cu bista.
Tarea di Parlamento
Mirando e situacion di personan cu discapacidad, ta na su lugar pa e instituto legislativo di pais Aruba cu ta su Parlemento, keda traha na mehoracion di leynan cu ta encera e persona cu discapacidad.
Parlamento ta na altura cu tin un Tratado di Derecho di Persona cu Discapacidad y cu e Plataforma pa Persona cu Limitacion (PPL) desde 2007 ta boga pa gobierno di Aruba ratifica e tratado aki. Sinembargo, na momento cu gobierno ratifica dicho tratado, gobierno mester cumpli cabalmente cu implementacion di e derechonan di personanan cu discapacidad. Teniendo na cuenta e situacion financiero y e totalidad di cambionan cu mester keda implementa, esaki lo ta un desafio grandi pa gobierno di Aruba.
Sinembargo, tur aña algun ministerio entre otro Ministerio di Husticia y Asunto Social, Educacion, Labor, Infrastructura ta tene na cuenta e persona cu discapacidad y ta aloca un suma na progreso y bienestar di e personanan aki.
Sr. Hoek den su funcion como Parlamentario a entrega un mocion pa gobierno oficialisa e parkeonan pa persona cu discapacidad, mirando e cantidad grandi (5.591) di persona cu lo mester haci uso di e parkeonan special aki. Sr. Hoek lo sigui boga pa e derechonan di personanan cu discapacidad pa asina por integra y participa lo mas tanto posibel den sociedad.
