Politica

Parlamentario Marco Berlis (MEP): Mike Eman su audiencia na Gobernador (Parti I)

Recientemente nos por a tende Parlamentario Mike Eman den un rueda di prensa, cu e la bishita Gobernador, cu cual e la comparti su experiencia di e bishita na Hulanda. Segun Eman cu e si lo por logra cu Aruba lo yega na un acuerdo pa converti e Afl. 915.5 miyon di e debe di COVID-19 den un fondo di desaroyo duradero pa Aruba. Den su rueda di prensa Parlamentario Mike Eman ta menciona varios punto di atencion cu e ta pretende cu e lo bay traha riba dje. Un di nan tabata e planta di RWZI na Bubali.

Mike Eman den 8 aña di gobernacion a lubida riba existencia di RWZI

Advertisements

Parlamentario Mike Eman den su rueda di prensa a declara cu mester solucionan pa temanan “grandi” manera RWZI Bubali. Ta bon pa referesca sr.Eman di e realidad di su gobernacion, cu a bin haya 970 miyon florin den caha di gobierno, y di cual e por a “upgrade” e planta di RWZI of traha un nobo como prioridad, pero esaki nunca a sosode. For di DOW Parlamento a haya e rapport di “Maintenance status” di RWZI den cual ta bisa lo siguiente;

  1. For di 2009-2017 rapport di Witteveen and Bos a duna instruccion kico mester wordo renoba y expandi na RWZI Bubali. Esaki tabata rekeri un inversion di respectivamente Afl. 12.5 miyon y 13 miyon. Cuanto Mike Eman a inverti 8 aña largo den RWZI Bubali? Apenas Afl. 1 miyon. Net net nada!
  2. For di 2009 caba a wordo informa na gabinete Eman cu mester un RWZI nobo. Uno cu lo por lidia ke capacidad actual di awa sushi cu a surpasa masha tempo e capacidad di e RWZI Bubali. Esaki lo mester a costa Afl. 60 miyon e tempo ey. Kico Mike Eman a haci? Net net nada!
  3. For di 2009-2017 a gasta Afl. 2.2 biyon na klinker y asfalt, Afl. 1.6 biyon na Plan BoAruba, cu a wordo cataloga como un desastre financiero, segun Algemene Rekenkamer, di cual no por a prueba unda tur e placa di e proyectonan aki a bay. Kico a haci pa RWZI? Mike Eman a maneha pais Aruba den tempo di bonanza pero pa RWZI e la haci “net net nada!”
  4. Dia 31 januari, durante di e Reunion Publico di Rapport Carmabi, mi a presenta un plan structural pa mantencion di e planta di RWZI Bubali y pa cumpra un planta nobo. Mike Eman y AVP a vota contra! Cooperacion di Mike Eman pa drecha RWZI? Net net nada!
  5. Mike Eman a traha un Plan di Gobernacion pa eleccion 2021-2025, den cual e no ta ni menciona un plan pa mehora of traha un RWZI nobo! Awe Mike Eman kier sali papia cu RWZI mester atencion urgente. Kico Mike Eman a haci durante su gobernacion? Ya bo sa e contesta.

Mike Eman ta papia di mehora Dump y sosten pa nos grandinan

Durante 2009-2017 kico Mike Eman a haci pa Dump na Parkietenbos y nos ancianonan? Net net nada. Alcontrario, enbes di soluciona e problema di Dump cu a empeora bao maneho di Benny Sevinger y yuda nos ancianonan, Mike Eman a masacra nos grandinan cu medida. Aki mi ta menciona algun;

  1. Mike a manda edad di pensioen di 60- pa 65 aña
  2. Mike a elimina Gelijkbedrag
  3. Mike a introduci Midelloon regeling
  • Mike a introduci Franchise
  • Mike a reduci duurtetoeslag
  • Djis cambiando edad di 60-65 aña, si un pensionado lo a haya Afl. 2.000 pa luna mes, Mike Eman a kita Afl. 24.000 pa aña y Afl. 120.000 den 5 aña for di nos grandinan!

Awo Mike Eman kier papia di sostene nos grandinan? Esaki ta e bon comun cu e ta papiando di dje? Kico bo a haci pa nos grandinan Mike? Net net nada! Ba laga nan den bancarota y den pobresa profundo. Awo Mike Eman ta papiando di crea un fondo di Afl. 900 miyon for di e debe di COVID cu pais Aruba tin cu Hulanda. Bo ta scucha Mike Eman ta papia con e ta bay paga su megadebe y drecha Aruba su finansas?? No!! E ta papiando un biaha mas con e ta bay tira cu placa sin usa un “rekensom!” Esaki ta otro intento desespera di Mike pa drecha imagen di AVP. Mike, e unico cos cu abo a haci cu nos pais ta lag’e “sin fondo y den fondo.” Pesey, y mucho mas, nunca mas Mike Eman!

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo Paarlamentario y sirbido di pueblo na bo ordo semper!