Parlamentario Ricky Hoek (MEP): Sr. Andy Lee ta e representante nobo di Aruba den Raad van State na Hulanda

ORANJESTAD, Aruba 3 december 2023: Recientemente, Sr. Andy Lee a wordo proponi como e representante di Aruba den Raad van State. Mescos cu na Aruba tin Raad van Advies, Hulanda y Reino tin Raad van State, cual ta e organo di mas halto cu ta duna conseho na gobierno di Hulanda y di Reino y ta wak con e proceduranan ta cana den su totalidad.

Parlamentario Ricky Hoek a duna di conoce cu algun siman atras el a trece dilanti cu Sra. Milly Schwengle a representa Aruba pa e ultimo 6 añanan den Raad van State caminda el a haci un tremendo trabao. “Recientemente den Conseho di Minister di Reino, Sr. Andy Lee a keda proponi como e siguiente representante pa Aruba den Raad van State”, a bisa.

Hoek a indica cu Sr. Lee ta un persona conoci, un politico tambe. E tabata Presidente di Parlamento di Aruba y tambe tabata Minister Plenipotenciario na Washington DC. “Mi ta kere cu Sr. Lee ta un candidato cualifica pa asina representa Aruba den Raad van State”, caminda e lo tin e bos pa representa e pueblo di Aruba.

A agrega cu pa Parlamento di Aruba esaki ta hopi importante. Fraccion di MEP ta hopi agradecido cu e trabounan di Sra. Milly Schwengle y di biaha ta expresa palabranan di pabien na Sr. Lee pasobra e ta e ‘link’ pa representa Aruba y debati pa Aruba den Raad van State na Hulanda.

“Fraccion di MEP ta desea Sr. Andy Lee tur clase di exito den su funcion nobo”, Parlamentario Hoek a expresa.