MINISTER ENDY CROES A ATENDE E RECEPCION DI BONBINI DI E CONFERENCIA DI CARIBBEAN FINANCIAL ACTION TASK FORCE (CFATF)

ORANJESTAD: En conexion cu e lucha contra labamento di placa, Minister di Enseñansa y Deporte Endy Croes hunto cu Prome Minister Evelyn Wever-Croes, Minister Xiomara Maduro, Presidente di Parlamento mr. Edgard Vrolijk y Parlamentario Hendrik Tevreden a acudi na Recepcion di Bonbini di e conferencia Caribbean Financial Action Task Force (CFATF) cu e aña aki a tuma luga na Aruba den e ballroom di Hilton Aruba Caribbean Resort & Casino. Ademas di esaki, Prome Minister Evelyn Wever-Croes a ofrece un recepcion pa e delegacionnan presente na Museum Archeologico Nacional Arubano, unda cu e delegacionnan por a comparti un rato ameno y aprecia e parti di e museo. Durante e conferencia a trata e topico di labamento di placa, cual ta un problema mundial. Un cantidad di persona di diferente parti di Caribe a bishita Aruba pa asisti na e conferencia y asina mustra cu trahando hunto por combati e problema aki y segura e integridad economico y financiero di e paisnan Caribense. Mester remarca cu Aruba ta e di dos pais di Caribe cu a pasa e evaluacion di CFATF exitosamente, pues esaki sigur ta un orguyo grandi pa Pais Aruba. Ademas di esaki, a nombra e director di Financial Intelligence Unit of Aruba, Sr. Angelo Brete como presidente di CFATF. Minister Endy Croes ta felicita Sr. Angelo Brete cu su encargo nobo como presidente di CFATF y ta dese’e hopi exito. Finalmente, Minister Endy Croes ta indica cu e ta contento cu Aruba ta trahando hunto cu otro paisnan di Caribe pa e lucha aki contra labamento di placa y percura pa mantene e integridad financiero di nos pais.