MIKE EMAN INVITA PA DUNA LECTURA NA HULANDA

Na un Congreso anual na Den Haag, Hulanda, cu ta dedica na fortifica y mehora e relacionnan den Reino, exPromer Minister y lider di AVP, mr. Mike Eman a worde invita pa duna un lectura y participa den un panel cu tambe lo profundisa den e relacionnan den Reino.

E congreso pa cual mr. Mike Eman a worde invita, pa duna un lectura, lo worde habri dor di Secretario di Estado pa Relacionnan den Reino, Alexandra van Huffelen. E congreso lo dura dos dia, 6 y 7 di december y ta tuma lugar den Nieuwspoort, den e edificio di Tweede Kamer der Staten-Generaal na Den Haag. E momento tambe ta uno di importancia pasobra e ta hustamente den e dianan cu Parlamentarionan nobo di Tweede Kamer lo worde huramenta.  

INVITACION PA EMAN

E invitacion pa mr. Mike Eman a bin a raiz di su ultimo bishita na Hulanda. E temanan cu a keda presenta y e reunionnan cu Eman y consehero Wendrick Cicilia a conduci na Den Haag Hulanda algun siman atras a lanta basta interes y atencion. Na tur instancia y na tur nivel cu e Lider di AVP, mr. Mike Eman cu consehero di fraccion, Wendrick Cicilia, a presenta e notanan di AVP na Den Haag Hulanda, pa institucion di un Sociaal Economisch Cultureel Planbureau y un nota bon documenta pa converti debe di Aruba na Hulanda den un fondo di inversion, por a  sinti simpatia y hasta admiracion pa locual mandatarionan Hulandes a yama “een creatieve oplossing”.

IDEANAN CU A RESONA DEN VREDESPALEIS PA TORENTJE

E promer caminda cu mr. Mike Eman a consulta riba e tema aki ta serca e experto constitucional respeta den Reino, actual Minister di Esatdo, anterior cabez di Raad van State y Minister den hopi gabinete cu un variacion grandi di cartera tabata mr. Piet Hein Donner. For di Vredespaleis a resona un signal positivo: e nota cu Eman a presenta lo por ta un caminda alternativa.

Tambe den het Torentje e tema aki a keda planta y Promer Minister Mark Rutte no unicamente tabata tin e cortesia pa ricibi e lider di oposicion, pero tambe a duna cara na Prensa pa splica kico e a combersa cu mr. Mike Eman. E tabata claramente un encuentro cu a crea perspectiva pa mas deliberacion riba solucion pa un problema grandi cu por bira un fundeshi firme pa inversionnan den futuro pa Aruba, algo cu CAFT a remarca recientemente cu ta haci hopi falta na Aruba.

LECTURA TA SIGUIMENTO RIBA PROPOSICIONNAN PLANTA

E tema di Eman su lectura lo ta riba e importancia di crea un Sociaal Economisch Cultureel Planbureau pa Aruba den cooperacion cu gobierno di Hulanda. Durante su bishita algun siman atrás Eman y Cicilia no unicamente a delibera cu mandatarionan y politiconan riba e tema pero tambe cu e propio directora di SCP, Karen van Oudenhoven y tambe cu Paul Schnabel cu tabata director durante 15 anja di e presitigioso instituto aki. Locual a resalta durante e reunionnan di trabao di Eman na Hulanda ta no únicamente cu portanan a habri cu hopi calor, aprecio y respet, pero tambe un deseo grandi pa por yega atrobe na dialogonan constructivo cu ta basa riba visionnan bon pensa den cual tur dos pais, Aruba y Hulanda, por mira un futuro cu perspectiva prometedor. Awe Eman y Cicilia ta bek na Hulanda pa duna siguimento na proposicionnan cu a crea perspectiva pa cambio na favor di di Aruba y e relacionnan den Reino.