Parlamentario Ricky Hoek (MEP) ta comparti su punto di bista riba e resultado di eleccion na Hulanda

ORANJESTAD, Aruba 5 december 2023:E resultado di e eleccion na Hulanda ta un tema cu ta wordo comenta hopi den e dianan aki, tanto na Aruba como den Reino Hulandes. Ricky Hoek, Parlamentario di Fraccion di MEP, a duna su punto di bista den un conferencia di prensa recien, unda el a splica cu e eleccion tabata un experiencia interesante pa loke ta politica den Reino.

“Ta un situacion unda tur pais den Reino ta bibando un suspenso grandi, pa wak cua ta e siguiente gobernacion y cua ta e siguiente gabinete cu lo wordo forma door di e partidonan cu a haya asiento durante e ultimo eleccion,” Hoek a indica.

El a resalta cu partido PVV a logra mas asientonan den e eleccion aki, pero tambe ta e partido cu kisas a causa tension of suspenso durante e proceso electoral aki. Pa Parlamento, ta crucial pa sigui e desaroyo politico den Reino pa asina por mira ora e gabinete nobo wordo forma.

Den e contexto aki, e pregunta esencial ta kende lo bira e siguiente Secretario di Estado cu lo representa asuntonan di Reino pa Gobierno di Aruba, y con nan lo maneha e negociacionnan pendiente manera e 6.9% cu ainda no a keda cla cu ne. “Nos ta sigui e desaroyonan politico aki di cerca y mi ta kere cu esaki ta un momento di politica cu mester di su atencion debido. Tambe nos ta keda cabes frieu pa wak tambe con e desaroyonan ta bayendo”, el a agrega.

Finalmente, Ricky Hoek a expresa deseonan di hopi sabiduria, pasenshi y exito na e politiconan na Hulanda den e formacion di e gabinete nobo.