EMAN Y DELEGACION DEN EERSTE KAMER

Durante su bishita na November Eman y su delegacion a concentra riba lidernan politico y miembronan di Tweede Kamer, den Gabinete Rutte y directornan di insitutonan importante. Actualmente exPromer Minister y lider di fraccion di AVP, mr. Mike Eman, ta na Hulanda pa e duna un lectura riba temanan importante den Reino. Simultaniamente Eman y su delegacion ta enfocando e vez aki riba contacto cu Eerste Kamer.

Den cuadra di esaki mr. Mike Eman awe a sostene diferente reunion hopi importante entre cual cu miembronan di Eerste Kamer Jeroen Recourt (PvDA) y Paul Paul Rosenmöller (GroenLinks). Durante e reunion aki Eman a worde acesora pa consehero di fraccion Wendrick Cicilia y Nerissa Lacle, experto financiero-economico.

ALTERNATIVANAN PRESENTA NA EERSTE KAMER

Ex promer Minster, mr. Mike Eman a splica cu durante e reunion cu miembronan di Eerste Kamer a duna un splicacion di locual ta su mission na Hulanda. Eman a discribi e nota di fraccion di AVP pa institutui un Sociaal Cultureel Planbureau pa Aruba pa garantisa cu e realidad socio-economico ta keda refleha den estudionan cu ta indentifica e retonan socio economico den nos Pais: pobresa creciente, un bida husto pa nos pensionadonan, baymento atras di cuido medico, costo halto di haci negoshi. Mester rapportnan cu ta mustra e realidad tras di cifranan cu un insitututo manera SCP por trece cla y profundisa padilanti. P’esey fraccion di AVP a presenta un mocion cu ta pidi pa instalacion di un Sociaal Cultureel Planbureau mescos cu Hulanda tambe tin. Sociaal Cultureel Planbureau no ta mira unicamente cifranan di finansas, pero ta mir’e den contexto di un desaroyo social economico caminda cada posicion di e ciudadano pa nan calidad di bida ta den contexto.

Den e cuadra aki tambe Cicilia a mustra e miembronan di Eerste Kamer Recourt y Rosenmöller riba e tema di “bestaanszekerheid” cu tambe ta un preocupacion na Hulanda, pero na Aruba e situacion a bira alarmante cu un pobresa grandi creciente. Cicilia a enfatisa cu mester incorpora e derecho ariba bestaanszekerheid den nos constitution pa asina garantisa cu Gobierno continuamente mester tin atention pa y esforso su mes pa realisa un miho calidad di bida pa nos comunidad, specialmente pa esnan cu ta biba bou di bestaansminim. A base di estudio di Cicilia fraccion di AVP ta prepara un proposicion di cambio constitutional pa por amplia nos constitution cu e derecho ariba bestaanszekerheid pa cada cuidadano.

CONVERTI DEBE CU HULANDA DEN FONDO DI INVERSION PA ARUBA

E otro tema, cu Eman y Cicilia a enfatisa y asesora pa e expperto financiero economico Nerissa Lacle  importante, ta esun di converti e debe di 900 miyon florin di Aruba na Hulanda den un fondo di inversion pa Aruba. Esaki lo ta un fuente importante di inversion den e siguiente 10 pa 15 aña. E proposicion cu Eman a presenta den un nota bon documenta ta mustra cu e debe di 900 miyon florin cu a fia durante di Covid, bou condicion di disciplina presupuestario acorda cu Hulanda, lo por worde destina pa un fondo di inversion na beneficio di Aruba pa inverti den un “meerjaren programma” di inversion pa Aruba acorda cu Hulanda. Esaki Eman a mustra e miembronan di Eerste Kamer ta hopi necesario pa Aruba. E recepcion den Eerste Kamer pa Eman y su delegacion tabata hopi respetuoso, atento y caluroso.