Conseho di Minister a ricibi bishita di Miss Universe Aruba Karol Croes
En conexion cu su participacion na e di 72 edicion di e certamen di Miss Universe na El Salvador
Recientemente, como reconocimento pa su contribucion sobresaliente y impacto positivo den nos comunidad, Miss Universe Aruba, Karol Croes, a wordo ricibi pa Conseho di Minister. E bishita aki ta bin como un reconocimento di su participacion den e di 72 competencia di Miss Universe, cual a tuma luga na El Salvador.
Conseho di Minister ta reuni a base regular cu personanan cu ta haci un impacto positivo den nos comunidad. E biaha aki riba peticion di Minister Xiomara Maduro Cultura, a invita Karol Croes como un hoben cu a haci impacto positivo den comunidad cu su participacion y bunita representacion di Aruba na Miss Universe. ‘E bishita di Karol Croes ta pone luz riba su rol ehemplar como embahador di e cultura rico y e balornan unico di nos Pais. Su participacion den e competencia di Miss Universe no solamente a pone nos isla riba un plataforma internacional, pero tambe a inspira hopi hobennan den nos comunidad,’ Minister Maduro a declara.
Durante su bishita na Conseho di Minister, Karol Croes a comparti su experiencia na e certamen aki y a comparti su iniciativanan actual y tambe su plannan pa futuro dirigi riba promove nos Pais su cultura y tradicion, vooral esun di fin di aña cu ta uno cu e kier comparti cu tur esnan cu ta sigui’e localmente, pero tambe internacionalmente. ‘E compromiso di Karol pa usa su plataforma pa cambionan positivo y envolvimiento den nos comunidad ta admirabel,’ Minister Maduro a añadi.
Conseho di Minister a probecha di e oportunidad aki pa discuti posibel colaboracionnan cu Karol Croes den iniciativanan cultural y empoderacion di hobennan. ‘Nos ta sumamente contento di por apoya proyectonan cu ta alinea cu nos vision di eleva nos comunidad y promove nos herencia cultural,’ Minister Maduro a bisa.
Minister Xiomara Maduro y Conseho di Minister ta extende nan felicitacion na Miss Universe Aruba, Karol Croes, pa su logronan y ta dese’e tur clase di exito cu su futuro proyectonan na bienestar di nos comunidad y di nos Pais.
