Parlamentario Shailiny Tromp-Lee: constantemente mi ta keda duna atencion na e retonan di nos studiantenan na Hulanda

Actualmente, hunto cu coleganan di Fraccion Edgard Vrolijk y Setty Yarzagaray, mi ta na Hulanda pa participa  na e “33e Congres Gezamenlijke verantwoordelijkheid, gelijkwaardigheid en wederzijds vertrouwen binnen het Koninkrijk.

Uzando e tempo eficiente y cu mi ta na Hulanda, mi a y lo tene diferente otro reunionnan.

Dialuna ultimo mi a reuni cu e mentor di Den Haag sra. Shahaira Brokke pa trata algun punto manera opvang di e studiantenan nobo, proceso administrativo manera BSN (burgerservicenummer), banco, vivienda, seguro di studiante, salud mental, mentor/decanaatfunctie y cambio di estudio. Mi a sinta cu sra. Brokke pa por haya informacion con den practica cosnan berdaderamente ta bay y pa haya sa si tin retonan nobo cu nos studiantenan ta encontra.

Desde 2 aña pasa mi a percura pa pone e situacion di retonan di nos studiantenan na Hulanda riba agenda di Tripartiet entre Aruba, Curacao y Sint Maarten y tambe riba esun di IPKO caminda Hulanda tambe ta sinta na mesa. Como base di discucion y dialogo pa trata e punto a uza e rapport “Kopzorgen Caribische studenten” publica pa e Ombudsman di Hulanda.

Como Parlamentario mi ta haya importante pa sigui urgi y empuha pa bin cu solucion concreto y structural pa haci e startpositie di nos studiantenan miho y elimina mas cu por retonan cu ta forma un limitacion of tin consecuencianan hopi negativo pa nan. Mi ta haya cu nos tur tin e tarea pa nos haci lo maximo pa nos studiantenan por sigui y termina nan estudio exitosamente. Y mesun importante ta pa nan bin cas bek y aporta na desaroyo di nos pais.

E reunion cu sra. Brokke a bay hopi bon y a crea algun punto di atencion cu sigur mi lo bay traha riba nan.

Mi lo ta topando cu sra. Brokke un biaha mas den un celebracion festivo di fin di aña hunto cu algun studiante di Den Haag. Sigur un oportunidad bunita pa mi por combersa y comparti cu nos studiantenan mes.