Parlamentario Darlaine Guedez-Erasmus: Celebrando e luna special di december cu actividadnan den bario
ORANJESTAD, Aruba 8 December 2023: Den un esfuerzo pa mantene bibo e tradicion di Pasco y reforsa e sentido di comunidad, weekend pasa na Club Caiquetio a organisa un evento cu ta resalta den e calendario di nos isla. E actividad aki, conoci como “E nificacion berdadero di Pasco” a logra reuni muchanan y nan mayornan den bario di Piedra Plat, Paradera, pa celebra e nacemento di Hesus, asina Parlamentario Darlaine Guedez-Erasmus a relata.
Durante e evento, e participantenan por a disfruta di un experiencia unico unda e palabra di Dios a wordo comparti den un manera creativo y inspirador. Tanto muchanan como adultonan a tuma parti den actuacionnan cu a duna bida na e mensahe spiritual cu Pasco ta representa. E celebracion a crea un ambiente festivo unda habitantenan a comparti nan alegria y a fortalece nan conexion cu nan bario y entre nan mes.
Pero e celebracion no a termina aya. Pa yuda sigui mantene e spirito di Pasco bibo, e bario di Piedra Plat ta prepara pa e proximo capitulo di nan serie di evento: ‘Ban Caya Edicion Pasco’. Durante e dia aki, lo tin diferente tent, skina di salud, skina di wega pa muchanan, show pa grandi y chikito, y hasta competencianan di futbol entre scolnan di kleuter cu lo lucha pa e medaya Ban Caya.
E Centro Famia Piedra Plat lo ta e epicentro di actividadnan manera artesania, delicioso pasaboca di Pasco y platonan navideño. Azucar Navideño Band lo brinda e toke musical pa completa e dia di celebracion.
Tur hende ta invita pa asisti na e evento y comparti nan diadomingo 10 december den un ambiente di alegria. Organisadonan ta subraya e importancia di promove participacion y unidad den e comunidad, un di e elementonan esencial pa lanta ciudadanonan fuerte y responsabel den nos sociedad.
Pa aña 2024, tin e intencion di sigui organisa mas evento cu ta uni e bario y stimula e sentido di identidad. Ta un compromiso cu nan ta tene na serio pa sigui fomenta e spirito comunitario vibrante cu ta caracteristico di Piedra Plat.
Tur hende ta invita pa forma parti di e celebracionnan y conoce mas di cerca tur e bon cosnan cu e bario ta ofrece. Uni den celebracion, Piedra Plat ta un bario cu ta briya cu luz propio y ta lucha pa un futuro mas uni.
Danki na tur e organisacionnan y boluntarionan cu ta haci e actividad aki posibel, Parlamentario Guedez-Erasmus a expresa.
